Shillong, Lber 17
Hadien ba la kem ïa u Shabamutlang Syiemlieh u suba nonglute ïa ki ar shaka uba 23 snem ka rta na ki thain Golflink myn ha ka 2 tarik u Lber 2026 , ki pulit ka East Khasi Hills District ki la ïoh ban kem ruh sa ïa ki 4 ngut kiwei pat kiba la suba donkti ha ka kam tuh ar shaka ha Shillong.
Katkum ka jingpyllait khubor u Superin-tendent of Police ka East Khasi Hills District u Bah Vivek Syiem, u la pyntip ba ïa kine ki 4 ngut la ïoh ban kem da ki pulit ka Jowai PS kiba dei kiba ju donkti ha ki kam tuh thuk thuk ha kaba ïadei bad ka mukotduma ha Laitumkhrah PS bad ha sadar Police station.
U SP u la pyntip ïa ki kyrteng kiba kynthup ïa u Vencentstar Tongwah uba 23 snem ka rta uba shong ba sah ha Nongmynsong Lumshyiap, u Kitborlang Mawlong 21snem ka rta na Mawsiatkhnam, u Royalroy Lyngdoh 23 snem ka rta na Mawsiatkhnam, u Ayan Kharthangmaw 21 snem ka rta na Mawhati, ki ophisar bad ki pulit na Pasteur Beat House ki la leit sha Jowai Police Station ban pynlong ka jingtohkit.
Ha ka jingtohkit kitei ki nonglute ki la phla ba ki la tuh ïa kawei ka Yamaha R15 na Umroi , kawei ka Yamaha R15 na Goraline, Laitumkhrah bad kawei ka scooty na Golflink, la ïathuh ba kiba bun ki thuk thuk kiba la dep tuh bad ki pulit ki dang peit bniah.
Shuh shuh hadien ba ki la tuh ïa ki arshaka, ki nongtuh ki la pynpaw ba ki la aiti ïa ki sha uwei u briew u bym shym pat lap bad tip kyrteng uba na Lad Rymbai. Kumta ka kynhun pulit kaba kynthup ïa ki ophisar bad ki kynhun tohkit na East Khasi Hills ki la leit sha Lad Rymbai Outpost bad la pynlong ka jingkhynra ha kawei ka ïing ba dang tei thymmai kaba don ha Lad Rymbai, Dongwah.
U Sp u la pyntip ba na katei ka jingtalasi na katei ka ïing la lap kaba ki la song bha bad la pynkhreh ban phah noh shawei, hynrei ha ka jingtohkit la lap noh ïa kawei ka Yamaha R15 kaba don ïa u R/NO. ML 05 AB 2991; kawei ka Yamaha Ray Z R/NO. ML05 AE 1478; ki bynta jong ka wei na Yamaha R15 kaba don ïa ka E/NO. G3N4E0601845, bad U Chassis No. ME1RG67HBP0013817 bad la lap na kawei ka bynta na kawei ka scooty kaba don ïa u E/NO. E33SE0218026 bad u Chassis No. ME1SEJ2H8N0016166.
Na ka liang ki pulit ki dang pynlong ka jingtohkit ïa kiba dang donkti sha lyndet.
