Shillong, Lber 17
U Bah Khroo Pariat President ka All Jaiñtia Muster Roll Workers & Labour Union bad uba dei ruh u nongaiktien ka Joint Action Committee Muster Roll Workers Union u la ong ba ka jingmih surok jong ki nongtrei Muster Roll, ka dei namar ba u Conrad Sangma u la shu kular kai ban ïakren halor ki mat jingdawa.
U la ong ba u Conrad Sangma u la kular dangshen ban sa ïakynduh bad ki nongtrei Muster Roll ha u bnai Kyllalyngkot 2026, hynrei haduh mynta um shym la khot ban ïakren. Kumta ban pynkynmaw biang ïa ki jingdawa ki hap ban mih sha surok ban pynlong ïa ka jingïakhih.
“Ngi hap leh da kaba tyngeh ban shim ïa ka sienjam ban pynlong da ka jingïakhih shong kyllaiñ mungor wat lada hap ban shong phatok ruh namar ka kpoh ka thngan bad dawa,” u la ong.
Ka jingdawa ki Muster Roll ka dei halor ka rta shongthait ba 65 snem, ban pynkiew ïa ka bai bylla sngi, ka jingbym pat jubab u Myntri Rangbah ïa ka memorandom ba la phah ka JAC, ka jingbym pat siew ka tulop ba dangsah bad kiwei-kiwei de ki jingdawa.
U Bah Khroo Pariat u la ïathuh ruh ba u Conrad u la ong ba yn sa ïakren khambha halor kine ki jingdawa ki nongtrei Muster Roll jong ka Jylla hynrei ka por mynta ka la ïaid bad kita ki kam ba ki nongtrei Muster Roll ki dei ban ïoh ki la shu long lehnoh ei.
U la ong ba ki nongtrei Muster Roll ki kwah ban pynbeit noh ïa ki rukom treikam jong ki tnad Sorkar katkum ki kyndon jong ka aiñ bad ban pyntreikam noh ïa ka Labour code.
Nalorkata, u Bah Khroo u la pynpaw ïa ka jingsngewdiaw halor ka jingbym kren ei-ei ki 60 ngut ki MLA haba ïadei bad ki Muster Roll ha ka Dorbar Mang Tyngka ka Sorkar Jylla kaba dang shu dep shen.
Shuh shuh u la ong ba kane ka dei ka sien kaba nyngkong ba ka seng ka pynjur ïa ki jingïakhih namar ba u Myntri Rangbah u la kular ban ïakynduh hynrei haduh mynta um shym la khot ban ïakren.
“Lada kim shah ïa ngi ban pynlong da ka jingïakhih kaba jur ngin hap leh beit da ka bor,” u la bynrap biang.
Haba kylli, u Bah Khroo u la ong “Mynta ngi dangsah ha ka umdum ba balei u Myntri Rangbah ka Jylla um shym la treh ban khot ïa ka seng ban ïakren. U la kular ïa ngi ban sa ïakren bha ha u bnai Kyllalyngkot 2026, halor ki jingdawa jong ka seng hynrei haduh mynta um shym la khot”.
