Shillong, Lber 17
Ki bor distrik ka West Garo Hills, ki la pynjlan shuh-shuh ïa ka korphiw ha kylleng ka distrik, sa da 24 kynta, ha ryngkat ka jingpynjynsur ha ka por mynsngi ban ailad ïa ki kam ba man ka sngi kumba ju long, da kaba kdew ïa ki jingma kiba dang ïai bteng haba phai sha ka jingshngaiñ jong ki paidbah.
Ka hukum ba la pynmih da u District Magistrate, u Vibhor Aggarwal ha ka Sngi Ba-ar katkum ka kyndon 163 jong ka Bharatiya Nagarik Suraksha Sanhita ka la ong ba ka korphiw kan treikam naduh ka por 6 baje mynstep jong ka 18 tarik u Lber haduh ka por 6 baje mynstep jong ka 19 tarik u Lber, lait noh lada weng noh hashuwa.
“Ym dei ban don uno-uno u briew u ban mih shabar jong ka jaka sah jong u,” ha ki kynta jong ka korphiw, la ong ka hukum, kaba maham ïa kiba pynkheiñ ba kin ngat ha ka jingpynshitom katkum ka kyndon 223 jong ka Bharatiya Nyaya Sanhita.
Kan don ka jingpynjynsur naduh ka por 6 baje mynstep haduh ka por 6 baje janmiet ha ka 18 tarik u Lber, ha kaba “baroh ki shlem pule, ki ophis, ki ‘bank’ bad kiwei-kiwei ki jaka kin treikam kumba ju long” ban pynsuk ïa ka leit ka wan jong ki paidbah bad ki kam ba man ka sngi.
U Agarwal u la ong ba la bthah ïa ki bor pynjari aiñ bad ki Executive Magistrate ban pyntreikam tyngeh ïa katei ka hukum, da kaba kdew ba ki jingjia jong ki jingkulmar bad jingpynthut ïa ka jingsuk paidbah ki buh jingma kaba khraw ïa ka jingim, ka jingshngaiñ bad ki jingdon-jingem.
