Jowai, Lber 17
Ka Jaiñtia Students’ Union (JSU) ha ka 17 tarik Lber ka la pynrem jur ïa ka Meghalaya Public Service Commis-sion (MPSC) namar ka jingweng noh ïa ka bhah jong ki Jaiñtia na ka jingpynbeit ïa ka jingpynbna kaba 14 tarik Lber na ka bynta ka jingthungkam Assistant Engineer da kaba maham ba kane ka jingleh bakla ka buh jingma ïa ka jingithuh ïa ka jinglong kyrpang jong ki Jaiñtia.
Ha u kyrwoh, ka JSU ka la ong ba ha ka jingpynbna kaba la don naduh nyngkong la buh ïa ka bhah “Khasi-Jaiñtia” hynrei ka jingpynbeit ïa ka jingpynbna laitkam jong ka tnad Urban Affairs ha u Nohprah 2021 ka kdew tang ïa ki Khasi.
Kane ka jingleh bakla kaba khlem da batai shai kala wanrah ka jingsngewkhia kaba jur ha kaba ïadei bad ka jingithuh bad ka jinglong kyrpang jong ki Jaiñtia,” ong ka seng.
“Ka JSU Central Body ka shim ïa kane kum ka kam kaba sngewkhia jur bad ka pynrem jur ïa kano-kano ka jingleh ne ka jingbym shimkhia kaba paw ban pynduh ne ban leh bym kheiñ snep ïa ka jinglong kyrpang bad ka hok jong ka jaidbynriew Jaiñtia. Kiba kum kine ki jingleh bakla, la ki dei kiba thmu khnang ne da kumwei pat ka pynartatien ïa ka nongrim jong ka jingbym shah liang, ka jingkynthup lang bad ka jingïada katkum ka riti synshar ba la mang kyrpang ban ïada ïa ki trai ri trai muluk,” ka la bynrap.
Ka JSU ka pynïasoh ruh ïa kane ka jingpynbna bad ka jingïakren ba dang shen hapoh ka ïingdorbar thaw aiñ ha kaba u nongmihkhmat napoh Nongkrem Constituency u la kiar ban ai jingithuh ïa ka jaidbynriew Jaiñtia.
“Kane haba khmih khmih bniah ïa kaei kaba jia mynta, ka pyni ïa ka jingleh kaba pynkhuslai shibun ban leh bym kheiñ snep ïa ki paid Jaiñtia,” ong ka seng.
Haba dawa ïa ka MPSC ba kan pynbeit ïa kane, ka JSU ka la ong, “Ngi kyntu ïa ka MPSC ba ka dei ban pynshai mardor ïa kane ka kam bad ban shim ïa ki lad ki lynti ban pynbeit mardor khnang ban pynrung biang ïa kane ka bynta kaba dei hok jong ki paid Jaiñtia ha baroh ki jingthoh bad ki kot ki sla ka Sorkar. Ngi khot ruh ïa ki bor ba dei khmih ban pynthikna ïa ka jingithuh bad ban burom bad pynskhem ïa ki hok jong ki paid Jaiñtia.
