Shillong, Lber 17
Ki nongtrei Muster Roll jong ka Jylla ha ka 17 tarik u Lber 2026, ki la shim ïa ka rai ban pynlong ïa ka jingïakhih shong kyllaiñ mungor ha ka 09 tarik u Ïaïong (April), 2026, namar ba ka Sorkar lyngba u Conrad K Sangma um shym khot ban ïakren halor kiba bun ki mat jingdawa jong ki.
Ha kane ka sngi shim ïa ka rai, ki nongtrei Muster Roll kiba don da ki spah ngut ha State Central Library, ki la ïeng bad rah kti ban ai ka jingkyrshan ban pynlong noh da ka jingïakhih shong kyllaiñ mungor haduh ba ka Sorkar kan sngap ïa ki jingdawa jong ka kynhun.
Hashuwa kane ka jingïashim rai ban pynlong da ka jingïakhih shong kyllaiñ mungor, ki nongtrei Muster Roll hapoh ka shatri jong ka All Jaiñtia Muster Roll Workers & Labour Union (AJMRWLU) bad ka Joint Action Committee Muster Roll Workers Union (JACMRWU) kiba da ki spah ngut ki la pynlong ïa ka jingïalang ha State Central Library, Shillong ban ïakren bad phylliew jingmut halor ki mat ki jura ba ka kynhun ka dawa na ka Sorkar.
Hadien kane ki nongtrei Muster Roll ki la ïa mih ban ïaid paidbah ne ka rally kaba jai-jai, ban pynkynmaw biang ïa ki mat jingdawa na ka Sorkar Jylla.
La sakhi ba da ki spah ngut ki nongtrei Muster Roll kiba la ïasnohktilang ha kane ka jingïaid paidbah, ba kynthup ïa ki nongtrei Muster Roll kiba na ri Khasi-Jaiñtia bad na Garo ruh kumjuh.
Lah ban kdew ba ki jingdawa jong ki nongtrei Muster Roll ki kynthup ïa ka rta shongthait, ka jingbym pat jubab u Myntri Rangbah ka Jylla, u Conrad K Sangma ïa ka Memorandom ba la phah ka JAC dangshen, ka jingbym pat dep siew ïa ka tulop ba dangsah, bad kiwei kiwei de ki jingdawa.
Ïa kane ka jingïaid paidbah ki nongtrei Muster Roll ki la sdang na State Central Library, ter-ter sha All Saint, Barik, Sha Malki bad wan phai biang sha State Central Library ha ryngkat ka jingpyrta kaba jam.
Ha ki plakad ki nongtrei Muster Roll ki la thoh “Ngi dawa ïa ka hok”, “Ko Sorkar ai ïa ka hok jong ngi”, bad kiwei-kiwei de ki jingthoh dawa na ka Sorkar Jylla.
Kumta baroh ki nongtrei Muster Roll ki la shim ïa ka rai ban pynlong da ka jingïakhih da kaba shong kyllaiñ mungor haduh ba ka Sorkar kan sngap ïa kaei ba ka kynhun ka dawa.
