Jowai, Lber 17
Ki nongïalam ka Dorbar Elaka Shilliang Myntang ha ka 16 tarik Lber ki la leit ïakynduh ïa u Deputy Commissioner, West Jaiñtia Hills ha kaba ïadei bad ka jingkhanglad jong ki bor ka Assam ïa ki nongshong shnong ka Lapangap bad Mukroh ba kin leit sha ki lyngkha rep jong ki.
Ka Elaka Shilliang Myntang ha u kyrwoh lyngba u Secretary ka pynpaw ka jingsngewkhia kaba jur halor ki jingeh kiba ïadei bad u pud u sam kiba dang ïai bteng bad kiba ktah jur ïa ki paidbah nongshong shnong ka Lapangap bad ka Mukroh.
La ïathuh ba ki nongrep bad ki trai shnong na baroh artylli ki thaiñ ki la shah khanglad ha ki pulit, ki Karbi bad ka KAAC Assam ba kin leit sha ki jaka rep jong ki bad kaba la wanrah ka jingeh kaba khraw ïa ki nongshong shnong kiba shaniah tylli ïa ka jingim jong ki ha ka rep ka riang.
Ka Elaka ka la ong ba ka jingbym ïohlad ban leit rep ïa ki jaka jong ki ka la pynmih ïa ka jingsngewkhia kaba jur ha kaba ïadei bad ka jinglah ban pynbiang bam bad ka jinglong jingman ha ka ïoh ka kot.
Ha kane ka jingïakynduh ïa u DC ha Jowai, ka Dorbar Elaka Shilliang Myntang ka la kyntu ban shimkhia bad ban wad mardor ïa ki lad ki lynti ban pynbeit bad wanrah pat ïa ka shongsuk shongshngain ha kitei ki thaiñ khappud.
Ha kane ka jingleit ïakynduh la ïa don lang ruh u Bah Daarphi Sariang, u nongïarap shimet jong u dolloi, u Deimonmi Tang, Secretary ka Elaka Shilliang Myntang, Deimonmi Lyngdoh, Waheh Shnong Lapangap, Samkhih Situng, Assistant Waheh Shnong Lapangap, Kitlang Muskut, Waheh Shnong Mukroh bad u Precaustar Sten, Secretary Shnong ka Mukroh nalor kiwei pat ki para dkhot na ka shnong Lapangap bad Mukroh.
Ki nongkitkam ka Elaka ki la pynpaw ruh ïa ki jingeh kiba kum ki nongshong shnong ki ïakynduh namar kane ka jingshah pyndik kaba dang iai bteng ha ki bor ka Assam, bad ki la kyntu ïa ka bor District ban tuklar lem mardor khnang ba kin ïoh biang ïa ki jaka rep bad ba kin lah ban leit trei leit ktah da ka jingshngain.
Ka Dorbar Elaka Shilliang Myntang ka kyrmen skhem ba ki bor ba dei peit kin shim mardor ïa ki sienjam ba donkam bad ban pynbeit kloi ïa kane ka kam kumjuh ban ïada ïa ka hok bad ïa ka kamai kajih jong kine ki nongshong shnong ba shah ktah.
