Shillong, Lber 17
Ka Altus Badminton Aca -demy kan pynlong ïa ka lympung ïalehkai ‘Prize Money Badminton Tour -nament’ mynta u bnai bad ka jingthmu jong kane ka lympung ka long shi bynta ban plie lad ïa ki samla kiba dangkhie dangsan ba kin pyni ïa ki sap ba kyrpang jong ki.
Ïa kane ka lympung yn pynlong ha ka 27 bad 28 tarik mynta u bnai ha Shillong, ha kaba la phiah ha la ki jong ki kyrdan kata ka Under-11, Under-13, bad ka Under-15.
Kat kum ka jingpynbna da ki bor pynïaid ki la pynlong kane ka lympung ka kynthup ïa ki khynnah kynthei bad shynrang naduh ki jingïalehkai singles bad doubles matches. Te kumta la kyntu ïa ki nongshim bynta ba ki lah ban phah ïa ki kyrteng jong ki hashwa ka 24 tarik mynta u bnai.
Ka bai rung ka long T. 300 marwei na ka bynta ki nongïalehkai Under-11 bad ka Under-13, katba na ka bynta ka Under-15 ka bai rung kan long T. 500 marwei.
Shuh shuh ki bor pynïaid ki la pynbna ruh ba ka jingailad ïa ki nongshim bynta kam long kaba bun bad dei tang kito kiba wan ai kyrteng kham kloi kiba lah ban ïoh ïashim bynta ha kane ka lympung.
La khmih lynti ba kane ka lympung kan khring kiba don ïa ki sap ïalehkai ba kyrpang na kylleng ki district ka Jylla, namar ba katei ka shlem ai jinghikai ka dang bteng ïa ka jingpyrshang ban kyntiew ïa kane ka jingïalehkai badminton bad ban plie lad ïa ki sap ba kyrpang jong kiba dangkhie dangsan.
