Tehran, Lber:
Ka Iran ka la ong ba ka long kaba la khreh ban shim ïa ka thma Middle East “katba donkam” namar ba ka la pynlong ïa ki jinghiar thma ha kylleng ki bynta jong katei ka thaiñ ha ka Sngi Nyngkong, katba u Donald Trump u la pynbor ïa ki bor pyrthei ban ïarap ban plie biang ïa ka lynti kit lieng kaba la khang pyrshah da ka ri Islamic.
Ka dor jong ka umphniang ha ka pyrthei ka la kiew da 40% haduh 50% namar ba ka Iran ka la hiar thma ïa ki lieng ha ka duriaw bah Hormuz bad ka la pynlong ïa ki jinghiar thma ha Gulf, kum ka jingpynshitom beiñ ïa ka thma ba la sdang pyrshah ïa ka da ka America bad ka Israel.
Ki shipai Revolutionary Guards jong ka Iran, ki iathuh ha ka sngi Nyngkong, ba ki la thombor ia ka Tel Aviv bad ka kad liengsuin Ben Gurion ha Israel, bad kumjuh ruh ia ki ktem shipai, ba la pyndonkam da ki shipai jong ka US, ha United Arab Emirates bad Bahrain.
“Haduh mynta ki la ïoh ïa ka jinghikai kaba bha bad ki la sngewthuh ïa ka jaitbynriew kaba kumno ki ïakynduh, kawei ka jaitbynriew kaba khlem artatien ban ïada ïalade bad kaba kloi ban bteng ïa ka thma shano shano ruh kaba lah ban ïalam, bad ban rah ïa ka katba donkam,” ong u Myntri kam bar ri u Abbas Araghchi ha ki nongthoh khubor ha Tehran.
Ka drone ka la thang ia ka tank umphniang hajan ka kad liengsuin jong ka Dubai, kaba la pynthut ia ka jingleit jingwan, katba uwei u namding u la pyniap ia uwei u riew paidbah uba don ha ka kali jong ki ha Abu Dhabi, bad kawei pat ka drone ka la pynmih ia ka jingpluh ha ka jaka ba don ki jingtei umphniang ha ka emirate ba shatei jong ka Fujairah.
Ki jingbthei bom ki la bthei ha ka nongbah jong ka Iran ha ka Sngi Nyngkong katba ki air defence systems ki dang treikam, la ong uwei u
nongthoh khubor bad ka Israel ka la ong ba ka la thombor ruh ia ki nongbah Shiraz bad Tabriz.
Palat ar taiew hadien ka thma Middle East, u nongrahktien ka tnat shipai Israel, u Brigadier General Effie Defrin, u la ong ba ki dang don “da ki hajar tylli ki thong ha Iran, bad ngi dang ithuh ïa ki thong thymmai man la ka sngi”.
