Shillong, Lber 18
Ki kmie ki kpa jong ki khynnah skul ki pynpaw ïa ka jingsngewkhia kaba jur haba ïadei ka jingkiewdor palat ka bai bos bad kyntu ïa ka Sorkar ba ka dei ban tuklar mardor ban pynhiar ïa ka dor bai bos ka ban kham pynsting ïa ki longïing longsem.
Ki kmie ki kpa kiba shah ktah, na kane ka jingkiew dor ka bai bos ki dei kiba shim ïa ka jingshakri Meghalaya Transport Corporation (MTC) bad ki STEM bos kiba dang shu pynmih thymmai.
Ki kmie ki kpa ki khynnah skul ki ïathuh ba ka bai kali shibnai ka la kiew bha na ka dor T. 1000 sha ka T. 1800 bad pynpaw ba kane ka jingkiewdor ka la ktah jur bha ïa ki longïing kiba duna ha ka ïoh ka kot.
Ki kmie ki kpa ki pynpaw ba ka jingpynkiewdor ki bos ba dang shen ka dei hadien ki jingbthah jong ka National Green Tribunal (NGT), kaba la khang ïa ki bos kiba la rim ban kamai namar ka jingbym bud ryntih ïa ki kyndon jong ka mariang. Kum ka jingpynrem, ka Sorkar Jylla lyngba ka tnad Transport, ka la pynmih ïa ki bos STEM kiba thymmai. Hynrei la ïathuh ba katei ka jingkylla ka la pynlong ïa ki ka jinglut kaba heh bad kaba la ktah ïa ki nongleit nongwan.
Ha ka 18 tarik u Lber, ka kynhun jong ki kmie ki kpa kiba sngewkhia ki la ïakynduh ïa u Bah Sniawbhalang Dhar, Symbud Myntri Rangbah ka Jylla uba dei ruh u Myntri ka tnat Transport ban pynpaw bad pynsngew ïa ki jingeh jong ki bad ïa kane ka kynhun la ïalam da ka Kong Lawanhi Sohtun bad ka Kong Sony Kharjana.
Haba kren sha ki lad pathai khubor, ka Kong Sony Kharjana ka la ong ba kane ka la ktah bha ïa ki longïing longsem kiba duna ha ka ïoh ka kot, ha kaba ki la don kiba thmu ban pynsangeh noh ïa ki khun ban phah sha skul namar ba ka la heh palat ka jingsiew.
Ka kynhun ka la aiti ïa ki mat jingdawa kiba bun sha ka Sorkar, kynthup ïa ka jingpynbeit ryntih ïa ka bai bos, ka jingïarap pisa na ka bynta kiba kham tlot ha ka liang ka ïoh ka kot, ka jingpyntreikam ïa ka rukom siew kaba ïaryngkat bad ka jinglong kaba shai ha kaba pynbeit ïa ka bai bos.
U Symbud Myntri Rangbah u Bah Sniawbhalang Dhar u la pynthikna ïa kane ka kynhun ba yn sa peit bniah bha ïa kane ka kam.
