Shillong, Lber 18
Ka Paris Saint-Germain, Real Madrid bad ka Arsenal ki la lah ban pynpaw ïa ka jingtbit na ka bynta ban jam sha ka quarter-final jong ka UEFA Champions League ha ka sngi Balang, katba ka Sporting CP ka la lah ban wanphai da ka jingjop na ka bynta ban pynkut noh ïa ka jingïaid jong ka Bodo/Glimt.
Ka PSG ka la bteng ïa ka jingkhlaiñ bor na ka bynta ban pynliem biang sa shisien ïa ka Chelsea da 3-0 kol ha ka wat kaba ar jong ka pre-quarter final kaba la long ha Stamford Bridge ban pynskhem ïa ka jingtam da 8-2 ha ka aggregate. Kane ka kynhun ka la ïoh ban pynkhihjar tang mar ïasdang ka jingïalehkai lyngba u Khvicha Kvaratskhelia hapoh 6 minit bad kane ka dei na ka daw ka jingbakla u rangïalehkai ‘dien ka Chelsea u Mamadou Sarr.
Ïa kiwei pat ki kol la thep da u Bradley Barcola hadien ka jingïarap pynbuh da u Achraf Hakimi bad kawei pat da u rangïalehkai shongben u Senny Mayulu na ka bynta ban pynurlong syndon ïa ka jingjop ha kane ka jingïalehkai shabar na la ïing.
“Ngi la lah ban ïalehkai bha ha baroh ar tylli ki wat jingïakhun bad ngi dap da ka jingkmen kaba khraw ban rung sha ka quarter final bad nga sngew ban ong ba ka long kaba dei hok,” la pynpaw u coach ka PSG, u Luis Enrique hadien ba la kut ka jingïalehkai. Mynta ka PSG kan ïakynduh pyrshah ïa ka Liverpool lane ka Galatasaray ha ka quarter final.
Ym tang ka Chelsea ka kynhun jong ka Premier League kaba la kut noh ka jingïaid lynti, kymjuh ka Manchester City kaba la shah tam da 5-1 lyngba ka aggregate hadien ba ka la shah rem da 2-1 kol ha la ïing ha ka Real Madrid. Kane ka kynhun ba khlaiñ bor na Spain ka la lah ban ïalehkai bha ha ka wat kaba nyngkong (1st leg) bad kane ka la wan urlong lyngba ka hat-trick ba la ïoh da Federico Valverde.
Kumba ka paw ka City ka la sdang ban kulmar jingmut hadien ka jingshah beh noh u Bernardo Silva tang hapoh 20 minit na ka daw ba u la pyndei da ka kti ïa ka bol bad kane ka ailad ïa u Vinicius Junior ban pynkhih jar nyngkong lyngba ka penalty. Watla u Erling Haaland u la lah ban pynphai, hynrei hashwa ban wai u Vinicius u la lah ban pynurlong ïa ka kol kaba khatduh na ka bynta ban khur syndon ïa ka jingjop.
“Baroh na ngi ki nongïalehkai ngi tip ba ki jingïalehkai bha ki wan lyngba ka jingïatrei lang watla ka Madrid ka ïalehkai ha man ki jingïakhun,” la ong u Vinicius.
Ha kawei pat ka liang ka Arsenal ka la nangjan ban ïohpdiang ïa ka trophy lyngba ka jingjop ïa ka Bayer Leverkusen da 2-0 kol na ka bynta ban tam da 3-1 ha ka aggregate. Kane ka la wan urlong lyngba u Eberechi Eze bad u Declan Rice, kiba la ïoh ban thep ha ka kylla step.
“Ha ka jingshisha ngi la dei ban thep saw lane san kol, hynrei ha kaba kut ngi dei hok ban khur ïa ka jingjop,” la ong u coach ka Arsenal u Mikel Arteta hadien ba la kut ka jingïalehkai.
Ha Lisbon, Ka Sporting ka la wanphai da ka jingkhlaiñ bor ha la ïing watla ka la shah rem da 3-0 kol ha ka wat kaba nyngkong bad ha kane ka kynti kaba mynta ka la lah ban pynliem ïa ka Bodo/Glimt da 5-0 kol hadien ka ‘extra time’. Kine ki kol ki la wan urlong lyngba u Goncalo Inacio, Pedro Goncalves bad u Luis Suarez uba la ïoh lyngba ka penalty na ka bynta ban pynlong ïa kane ka jingïalehkai ban bteng sa ïa ka ‘extra time’.
Te kum u Maxi Araujo u la lah ban pynurlong ïa ka Sporting hashwa ban u Rafael Nel un thep sa shi kol na ka bynta ban khur syndon ïa ka jingjop.
Lyngba kane ka jingjop ka Sporting ka la lah ban jam sha ka quarter-final ha ka sien kaba nyngkong eh naduh ba ka la rung teng ha u snem 1983, bad ban pynkut noh shi syndon ïa ka jingïaid lynti ka Bodo/Glimt ha kane ka lympung.
