Shillong, Lber 18
Ka Donkin CC ka la pynliem noh ïa ka Winds CC da 16 run na ka bynta ban khur jingjop ha ka lympung ïalehkai Late P.A.Sangma Memorial T20 Cricket Tournament 2026 ha ka sngi Balang ha madan ïalehkai jong ka MCA ha Polo.
Ha kane ka lympung ba la pynïaid da ka Shillong Cricket Association (SCA), ka Donkin ka la kam trai ban tied nyngkong ha kaba ka la kamai 132 run bad shah pynhap 9 wiket ha ki 20 over. U Agreas Cham Cham Sangma u la tied 28 run na ki 24 bol bad u Rohit Rai u la ïoh 23 run na ki 18 bol. Katba u Lokesh Turaha u la khur 3 wiket bad ïa ki 3 wiket la khur da u Pritam Singh.
Haba wan beh ïa ka thong ki nongtied ka Winds ki la shah pynkhyllem baroh bad kamai tang 116 run ha ki 19.3 over. Kane ka la wan lyngba ka jingïalehkai bha u Rahul Shah, uba la khur 4 wiket bad ïa ki 2 wiket da u Rohit Rai. Katba ki nongtied ka Winds u Aditya Mahala u la tied 25 run na ki 20 bol bad u Manish Sangma u la ïoh 23 run na ki 11 bol. Ïa ka nam Player of the Match la khur da u Rahul Shah.
Haba phai sha kawei pat ka jingïalehkai kaba ar, ka Royal CC ka la jop da 111 run ïa ka Metallica Rising. Ka Royal kaba la shimti ban tied nyngkong, ka la kamai 180 run bad shah pynkhyllem baroh ki nongtied ha ki 18 over. U Swastic Chettri u la lah ban pynpaw ïa ka jingtbit ha kaba u la ïoh ban khyrwit 62 run na ki 38 bol bad u Roshan Warbah u la ïoh 41 run na ki 22 bol. Katba u Abid Khan u la khur 6 wiket bad ïa ka 1 wiket la ïoh da u Krishna Magar Thapa.
Haba wan beh ïa ka thong ba la buh da ka liang pyrshah, ka Metallica Rising ka la kamai tang 69 run hadien ba ka la shah pynkhyllem baroh ki nongtied ha ki 15.1 over. Kane ka la wan lyngba ka jingïalehkai bha u Dippu Sangma, uba la khur 2 wiket bad ïa ki 3 wiket ba la khur da u Reshabh Dipak. Katba ki nongtied ka Metallica u Yogendra u la tied 20 run na ki 15 bol bad u Nikhil Thapa u la ïoh 13 run na ki 21 bol. Ïa ka nam Player of the Match la khur da u Reshabh Dipak.
