Nongstoiñ, Lber 18
Ha ka 17 tarik u Lber, 2026 ki bahaïing ki la lap noh ïa ka samla Andalucia Sangriang, ka khun kaba la jah na shnong Pyndengrei ha West Khasi Hills.
Ka tyllong khubor na ki bahaïing la ong ba hadien kumba katto katne por ba la mih ha ki lad pathai khubor, ki trai ïing kiba la ai bylla ïa katei ka samla ki la phone noh mar mar sha ki bahaïing ha kaba la ong ba katei ka samla ka don ha kawei na ki kyntoid jong ka shnong Pyndengrei kaba dei ka shnong kaba dang hap hapoh u pud u sam jong ka sor Nongstoiñ.
Kum ban shu pynkynmaw, ka samla Andalucia Sangriang ka dei ka khun jong u Bah Nightstar Snaitang bad ka Kong Skildaris bad ka la jah na la ïing khlem da kynjoh ktien ïa la ki kmie ki kpa ba ka leit ban wad bylla hadien ba ka la kwah eh dik dik ban ïoh bai skul ïalade bad ban kyrshan ïa la ki kmie ki kpa ha ka ïoh ka kot hynrei dei tang na ka daw ba ka la kum klet ban kren ïa la ki kmie ki kpa, ka la pynkulmar thlim ïa ka ïing ka sem bad ka dei ruh ka samla ka bym ju kwah ban bat mobile kumta ka la shem jingeh noh ïa ki bahaïing ba kin lap kham kloi.
Shuh shuh katei ka samla kaba dang 18 snem ka rta ka dei ka khun nyngkong bad kaba dang ap ruh ïa ka result jong ka class XII na Sibsingh Memorial Governments Higher Secondary School Nongstoiñ bad ka la jah naduh ka 13 tarik sngi Thohdieng ha kaba kiba haïing hasem ki la shu bna nangne nangtai ba ka la leit ïa ka ban leit bylla bad ka la mih na la ïing naduh ka por 9 baje eiei mynstep jong ka 13 tarik u Lber 2026.
Ki kmie ki kpa kila pynpaw ruh ïa ka jingsngewnguh kaba khraw ïa ki paidbah kiba la ai mynsiem ïa ki hapdeng ka jingpisa mynsiem.
