Kabul, Lber:
Katkum ki khubor, la ong ba palat 400 ngut ki briew, ki la duh ei ia ka jingim bad kumba 250 ngut ki la mynsaw, ha ka jingleit hiar thma jong ki liengsuiñ iapom ka Pakistan sha kawei ka Hospital, kaba don hapoh ka nongbah Kabul jong ka Afghanistan, la iathuh u Lamphang jong ka sorkar Taliban ha ka Sngi Ba-ar.
U nongai ktien jong ka sorkar Afghanistan, u Hamdullah Fitrat, u iathuh ba katei ka jingshah thombor da ki liengsuin, ka la ther ia katei ka jaka sumar, ha ka por kumba 9baje mynstep ha ka por jong ka ri, kaba la pynjot ia ki bynta kiba heh jong katei ka jaka sumar, kaba don 2,000 jingthiah.
Ka Pakistan, ka la kyntait ïa ki jingkynnoh jong ka sorkar Afghanistan bad ka la khot ïa ki, ki bym don nongrim, da kaba ong ba ym shym la don kano kano ka Hospital kaba la thombor ha Kabul.
U nongaiktien jong ka sorkar Afghanistan u Zabihullah Mujahid u la pynrem ïa kane ka jingshah thombor, da kaba kynnoh ba ka Pakistan ka “thmu ïa ki hospital bad ki jaka riew paidbah ban leh ïa ki kam shyrkhei”.
“Ka sorkar shipai jong ka Pakistan, ka la pynkheiñ biang sa shisien ïa ka suiñbneng jong ka Afghanistan bad ka la thmu ïa kawei ka jaka sumar pynbha ïa ki nongdih drok ha Kabul, kaba la wanrah ïa ka jingïap bad jingmynsaw jong ki nongdih drok kiba dang shah sumar,” u la thoh ha ka X.
“Ngi pynrem jur ia kane ka kam runar bad ngi shim ba kum kane ka kam ka long pyrshah ia baroh ki nongrim ba la pdiang bad ka long pyrshah ia ka jinglong briew,” u la ong shuh shuh.
U myntri ka tnat pathai khubor jong ka Pakistan, u Attaullah Tarar, u iathuh ba ki shipai jong ka Pakistan, ki la “pynlong ia ki jing thombor liengsuin kiba thikna” kiba thmu ia ki jaka buh shipai ha Kabul bad ha ka jylla Nangarhar, kaba shaphang mihngi.
U la ong ba “ki jingtei jingkyrshan ba stad bad ki jaka buh tiar siat” ha ki ar tylli ki jaka ha Kabul ki la shah pynpra.
“Baroh ki jingthmu la leh da kaba thikna tang ha kito ki jingtei kiba la pyndonkam da ka sorkar Taliban Afghanistan ban kyrshan ïa ki nongleh kam sniew ba bun jait jong ka,” u la thoh ha ka rynsan ‘X’.
Kane ka jinghiar thma kaba la kynnoh ka la jia katto katne kynta hadien ba ki heh sorkar jong ka Afghanistan ki la ong ba ki arliang mamla ki la ïa siat kuli ha khappud ba ïadei lang jong ki, ha kaba saw ngut ki briew ki la ïap ha Afghanistan, namar ka jingïakhun kaba shyrkhei tam hapdeng ki para marjan ha kine ki snem ka la rung ha ka taiew kaba lai.
Ka jingialeh ka la sdang ha u Rymphang hadien ba ka Afghanistan ka la hiar thma sha shiliang pud kum ka jubab ia ki jinghiar thma liengsuin ka Pakistan hapoh jong ka Afghanistan kaba ka Kabul ka la ong ba ka la pyniap ia ki riew paidbah.
Kitei ki jingialeh ki la pynthut ia ka jingsangeh thma kaba la pynlong da ka Qatar ha u bnai ba la dep jong u Risaw hadien ba ki jingialeh kiba kham mynshwa ki la pyniap ia ki phew ngut ki shipai, ki riew paidbah bad kiba la suba ba ki dei ki lehnoh.
U Khawaja Asif, myntri iada ri jong ka Pakistan, ula pynbna ba ka Pakistan, ka don ha ka thma kaba paw pyrthei bad ka Afghanistan.
