Tura, Lber 18
Ka Nangrimgimin A’chik Dol (NAD), ka kynhun ki seng Garo ka la dawa ban pyllait mardor ïa ki nongïalam jong ka kiba la shah kem ha ki pulit ka West Garo Hills ha kaba ïadei bad ka jingïakynad kaba dang shen ha Tura.
“Ngi dawa ban pyllait noh mardor ïa u Balkarin Ch. Marak, Acting Chairman ka Garoland Statehood Movement Committee bad Vice-President ka NAD, u Johnny A. Marak, uwei na ki nongïalam na ka seng A’CHIK lem bad kiwei-kiwei ki nongïa-lam NGO kiba la shah kem ha kaba ïadei bad ka jingïakhih kaba dang shen. Kine ki nongïalam bad ki paidbah kim shym la wan shakhmat na ka bynta kano-kano ka jingmyntoi shimet. Ki ïeng na ka bynta ka hok bad ki jingmyntoi jong ki trai-ri trai-muluk ka Ri-lum Garo,” la ong ka kyrwoh.
Ka kynhun ka la kdew ba ka jingïakhih ba dang shen ka don jingïadei bad ki lad jingïada jong ka Riti-Synshar ba la ai sha ki ‘riewlum katkum ka Article 244 (2) jong ka Khyrnit kaba 6 jong ka Riti-Synshar ka Ri India, bad ba ki kyndon jong ka, ki dei ki jingïada ba kyrpang jong ka Riti-Synshar kiba thmu ban ïada ïa ka snap kyrpang, ka khyndew ka shyiap, ki riti-dustur, ki shlem treikam, bad ka jingsynshar hi dalade jong ki jaidbynriew ‘riewlum.
Kane ka kynhun kaba la pynïasoh lang ka la kynnoh ruh ba ki bahaïing hasem jong kiba shah kem ki sah ha ka um-dum halor ka jingdon jong ki (kiba shah kem).
“La pyntip sha ngi ba ki bahaïing hasem kim lah ban tip shai shano la set ïa ki kumba ki dei ki nongleh kam sniew ne ki lehnoh. Kane ka la wanrah ïa ka jingtieng bad jinglynga-pisa hapdeng ka jaidbynriew Garo. Ngi kyntu jur ïa ka Sorkar bad ka tnad pulit ba kin pyntip mardor sha ki bahaïing hasem shano ki don bad ban ailad ba kin ïakynduh ïa ki. Kane kam dei tang ka jingsngewkhia para briew, hynrei ka mat jong ka jingbym leh shiliang bad ka hok,” ka la ong.
