Nongstoiñ, Lber 18
Ka ophis jong ka Deputy Commissioner ka West Khasi Hills District ka la pynmih ïa ka hukum hapoh ka Section 163 jong ka Bharatiya Nagarik Suraksha Sanhita (BNSS), 2023 bad hapoh Section 223 jong ka Bharatiya Nyaya Sanhita (BNS), 2023, kaba khang pyrshah ïa ka jingpyndonkam da ki dawai bih bad ki tiar pynbthei na ka bynta ka jingïoh dohkha lane kiwei ki kam ba pynjulor ïa ki wah bad ki wah rit ha ka district baroh kawei.
Ha ka kyrwoh khubor, na ka liang ka DC kala pynpaw ba ïa kane ka hukum la pynmih katkum ki kyndon kiba la pynbna ha ka Gazette of Meghalaya (No. 199 tarik 28/10/2024), kaba pynshong nongrim ïa ka jingïada kyrpang ïa ki jingthaw ba im ha ki um bad ïa ka mariang.
Shuh shuh kala ong ba kane ka hukum ka bthah ruh ïa ki bor shnong bad ki bor synshar ban khanglad ïa kino kino ki kam kiba pynsniew ïa ki wah bad ki pung um, kynthup ïa ka jingtei beaiñ ïa kino-kino ki jingtei hajan jong ki wah, ka jingpynkylla ïa ka lynti tuid um, ka jingïaid lait ïa ki jaka um, bad ka jingïasait kali ha ki um kaba wanrah ïa ka jingjaboh um.
Ka District Magistrate, Hema Nayak, IAS, ka la ong ba kine ki jait kam beaiñ ki la pynjulor bha ïa ka jingim jong ki dohkha bad kiwei ki jingthaw ha um, ka jingshngaiñ jong ka um ha ki wah bad ki wah rit jong ka district. Kumta la khang pyrshah ïa kino-kino ki briew, seng, kur ne kynhun briew ban leh ïa kine ki jait kam.
Nangta, kala ong ruh ba lada lap ïa kino-kino kiba pynkheiñ ïa kane ka hukum, yn pynshitom katkum ka Section 223 jong ka BNS Act, 2023. Namar ka jingdonkam kyrkieh, ïa kane ka hukum la pynmih mardor bad kan treikam beit kumne haduh ban da pynbna da kumwei pat. Shuh shuh kala kyntu ïa ki paidbah ba kin bud ryntih ïa kane ka hukum bad ban ïatreilang bad ki bor synshar ban ïada ïa ki wah, ki pung bad ki jingthaw ba im ha um.
