Mawkyrwat, Lber 18
Ka Federation of Khasi Jaiñtia and Garo People’s (FKJGP) South West Khasi Hills District ha ka 18 tarik u Lber, 2026 ka la leit ban noh synñiang ïa ka longïing jong kawei ka riew kynthei ha ka shnong Mawbidong, South West Khasi Hills District kaba la shah bam duh noh ka ïing ha ki thylliej ding kaba la jia ha ka 5 tarik u Lber, 2026.
Kane ka longïing ka dei jong ka Kong Rosinabel Syiemlieh, ka riew kynthei kaba don hynriew ngut ki khun bad kaba donkam kyrkieh ïa ka jingïarap namar bun na ki jingdon jingem bad ki mar ki mata ki la shah bam duh lut ha ka ding.
Ka seng hapoh ka jingïalam u Bah Kenesjune L Nonglait, President ha kane ka sngi ha ryngkat ka jingdon lang u Myntri Shnong Mawbidong, Bah Tanlumbor K Kharai da ka mynsiem sngewlem ka la noh synñiang da ki marbam, ki tiar shet, ki jaiñkup bad ka song pisa ïa kane ka longkmie.
Ka seng bad ka shnong ki la kyrpad ïa ki bor district ba kin pynkloi ka jingïarap sha kane ka longïing bad ha kajuh ka por ki la kyntu ruh ïa ki nongmihkhmat ba kin phai khmat lem sha kane ka longïing kaba donkam jingïarap ha kum kane ka por.
Ha kane kajuh ka sngi ka FKJGP South West Khasi Hills District hapoh ka jingïalam u Bah Balse Kharbani, General Secretary ryngkat ki dkhot ka Mawkyrwat Circle ki la hiar jurip ïa ka skul Eklavya Model Residential School kaba don ha Domjyrti hadien ka jingïoh jingjujor na ki paidbah halor ka jingsuki palat ka jingpyntrei ïa kane ka skul kaba la dep ban buh mawnongrim naduh ka 15 tarik u Naiwieng, 2024.
U Bah Balse Kharbani haba kren sha ki lad pathai khubor u la pynpaw ïa ka jingkmen halor ka jingwan jong kane ka skul hapoh ka district ka ban long shisha ka jingkyrkhu ïa ki khynnah pule ka dong ka thaiñ.
Hynrei u la pynpaw pat ïa ka jingsngewdiaw ban ïohi ba ka jingpyntrei ka suki bha, kumta u la kyntu ïa u kontraktor ba u dei ban kham pynstet noh kloi ïa ka jingpyntrei namar kumba long mynta tang ki païa ruh ym pat lah ban pynïeng.
Ha kajuh ka por u la maham jur ruh ïa u kontraktor ba um dei ban ïalam trei ïa ki bar jylla da kaba bynrap ruh ba ki briew lajong bad napoh ka district ki la lah ban trei ïa kum kine ki kam.
