Shillong, Lber 18
Ka sorkar Senegal ka la kyntu ban pynlong da ka jingtohkit kaba laitluid nabar ri halor ka jingsuba bamsap hapoh ka synjuk ïalehkai jong ka Africa hadien ba ka la knieh noh ïa ka Senegal ïa ka nam lahduh jong ka Africa Cup of Nations 2025 bad ka la ai noh sha ka Morocco.
Ka Senegal ka la pynliem ïa ka Morocco da 1-0 kol ha ka jingïakhun phainal kaba la long ha u Kyllalyngkot, hynrei ka Confederation of African Football (Caf) ka la pynkylla ïa ka rai ha ka sngi Ba-ar namar ba ki nongïalehkai ka Senegal ki la mih noh na madan kum ka jingpyrshah haba ka Morocco ka la ïoh ïa ka penalty hashwa ban kut ka jingïalehkai.
Te kumta ki rangïalehkai ki la wanphai biang hadien ka jing pynslem kumba 17 minit, bad ïa ka penalty ba la shut da u Brahim Diaz na ka bynta ka Morocco la lah ban ïada hashwa ba u Pape Gueye jong ka Senegal un thep ïa ka kol ha ka ‘extra-time’.
Hadien ka jingujor da ka Morocco FA (FRMF), ka Caf ka la rai ba ka Senegal ka la shah rem noh ha katei ka jingïalehkai, ha kaba la ai jop ïa ka Morocco ryngkat da 3-0 kol.
Ha ka kyrwoh ka sorkar Senegal ka la ong ba ka rai kaba ym pat ju jia mynno mynno ruh ka la pynlyngngoh namar ka la pynkheiñ ïa ki kyndon jong ka phutbol, kaba ïalam sha ka rai kaba be-aiñ bad kaba khlem don nongrim.
La ong, “Ka Senegal ka kyntait khlem jingartatien ïa kane ka jingpyrshang ban pyndonkam bakla.”
Kham mynshwa ha ka sngi Balang, ka Senegalese Football Federation (FSF) ka la ong ba kan ujor pyrshah ïa katei ka rai jong ka Caf sha ka Arbitration for Sport (Cas), da kaba ong ba kane ka rai ka long kaba ym lah ban pdiang.
“Kane ka rai ka dei ka jingpynkheiñ ïa ka jingshaniah namar kam shym la pynshong nongrim kat kum ki kyndon,” la ong u secretary general ka FSF u Abdoulaye Seydou Sow.
