Shillong, Lber 18
Ka Congress ka la kyntait ïa ka jingpynjlan ba dang shen jong ka Sorkar Jylla ïa ka samoi treikam jong ka Garo Hills Autonomous District Council (GHADC) sha ka 6 bnai hadien ka jingïakhih kaba jur halor ka jingïashim bynta jong ki bym dei ‘riewlum da kaba ong ba u Myntri Rangbah ka Jylla u la dei ban khot shuwa ïa ka jingïalang jong baroh ki seng saiñ pyrthei.
Ka Working Presi-dent ka Meghalaya Pra-desh Congress Commit-tee (MPCC), ka Deborah Marak ka la ong ba ka seng kam shym la kyrshan satia ïa katei ka sienjam bad ba ka rukom treikam kaba kham lyngkot bad kaba don ïa ka thong ka long kaba lah ban leh.
“Hynriew bnai ka la jlan eh,” la ong ka Deborah sha ki nongthoh khubor ha ka Sngi Balang.
Ka la kynthoh ba ka ilekshon ka la dei ban ïaid shakhmat ha ki 27 tylli na ki 29 tylli ki konstitwensi lait noh tang ka Shyamnagar bad Balachanda – ki 2 tylli ki konstitwensi kiba don hapdeng ka jingïaka-jia halor ka jingïashim bynta jong ki bym dei ‘riewlum.
“Ki lah ban pynsangeh noh ha kine ki 2 tylli ki konstitwensi, bad ban shah ïa ka jingthep ‘vote’ shawei pat, kumjuh ban ailad ïa ka ‘Executive Committee’ bathymmai ban wad ïa ka lad treikam kaba biang ban weng ïa kane ka jingeh kaba dang bteng mynta,” ka la ong.
Ka Deborah ka la ong ba ka Congress ka kyrshan ïa ka jingdawa jong ki Achik ba ki bym dei ‘riewlum kim dei ban ïakhun ha Shyamnagar bad Balachanda bad pynpaw ka jingsngewsih ba u Myntri Rangbah, u Conrad K. Sangma “um shym la khot ïa ka jingïalang jong baroh ki seng saiñ pyrthei,” ha kaba ka la ong ba kan jyn da la ailad ïa ka jingai jingmut ban khanglad bad pynsangeh shuwa ha kine ki konstitwensi.
“U Myntri Rangbah u la dei ban khot ïa ka jingïalang jong baroh ki seng saiñ pyrthei, hynrei um shym la leh kumta. Ngi lah ban ai ïa ki jingai jingmut – ngin jyn da la ai jingmut ban pynsangeh noh ïa ka ilekshon tang ha Shyamnagar bad Balachanda bad ban ailad ïa kiwei pat ban ïaid shakhmat. U la shim hi ïa ka rai dalade. Kum ka seng (ngi sngew) ka lynti kaba bha tam kan long ban pynsangeh noh shuwa ïa ka ilekshon ha kine ki 2 tylli ki konstitwensi bad ban ailad ïa ka ilekshon sha kiwei-kiwei ki konstitwensi,” ka la ong.
Ka la ïaroh halor kiba bun ki jingshah kem ha Ri-lum Garo hynrei ka la ong ba ki jingtip ba bniah kim pat da shai bha.
“Ngi la tip shaphang ki jingshah kem hynrei ym tip katno ngut ne ka kyrteng jong ki. Ka Sorkar bad ki bor jong ka aiñ kin sa leh eiei,” ka la ong.
Haba ñiew ïa ka jingjia kaba dang shen ha Ri-lum Garo kum ka jingjia kaba sngewsih, ka Marak ka la pynpaw biang ba ka Congress ka kyrshan ban pynlong mardor ïa ka ilekshon ha baroh lait noh tang ha 2 tylli ki konstitwensi kiba don ka jingïa-ka-jia.
Nalorkata, u Secretary ka MPCC, Bah Manuel Badwar u la ong ba ka GHADC ka dei ban pynkylla ïa ki kyndon jong ka khnang ba tang ki kyrtong ‘riewlum ki lah ban ïakhun ilekshon.
“Haba la thaw ïa ki ADC hapoh ka Khyrnit ba 6, u Jawaharlal Nehru (uba la khlad noh) u la kren shai ba ki ADC ki long ban pyntikna ba ki ‘riewlum ki don la ka jong ka synshar-khadar…ka hok ban synshar ïa la ka jong ka khyndew ka shyiap bad ki briew,” u la ong.
U la pynïasoh ïa ka jingdawa bad ka jingkylla ha ka jingbun briew ha Shyamnagar bad Balachanda bad ong ba ki kad jingïada jong ka Riti-Synshar ba la dep ban ai lypa “la dei ban bud ïa ki”.
Shuh shuh u la pynshong nongrim halor kiba bun ki snem jong ka jingbym leh eiei sha ka “jingbym don mon saiñ pyrthei” bad ka jinglong nongsynshar ban ïa kano-kano ka seng, da kaba bynrap ba ka jingbishar bniah katkum ka khana samari kan ïarap ban lum thup haba ïadei bad ka jingkylla ha ka jingbun briew.
“Ngim lah ban shu thiah lyngngai sah halor kane”, la ong u Bah Manuel haba ban jur ba “la dei ban shimkhia mardor lem bad ki lad ki lynti kiba biang,” ha ryngkat ki jingpynbeit kiba wan na ka Sorkar, District Council bad u Lat ka Jylla.
