Shillong, Lber 18
Ka Hynñiewtrep Integra-ted Territorial Organisa-tion (HITO) ha ka sngi Balang ka la leit tur sha ki katto katne ki karkhana pynmih plywood ba don ha Umiam ban dawa ïa ki Kompeni ban ai kam nyngkong ïa ki trai ri trai muluk haba ki wan ban buh karkhana hapoh ka Jylla.
Ha kane ka jingleit dawa ki dkhot bad ki nongïalam jong ka HITO ki la rah ïa ki placard ba don ki jingthoh “Ka pliang ja bad ka jakpoh ka dei nyngkong shwa ïa ngi, ki trai ri shwa hadien sa wan ki bar Jylla, kyndit noh khun ka ri kane ka dei ka ri jong ngi.” ha ryngkat ka jingpyrta ban dawa ïa ki kompeni.
La ïalam ïa kane ka kynhun da u President ka HITO u Bah Donbok Dkhar ha ryngkat ki nongïalam ka Seng kmie bad ha ka jingshimbynta ki phew ngut ki dkhot ba wan na ki Circle bad ki Unit bapher-bapher.
Ki karkhana ba ka HITO ka la leit ban pan jingpynshai, la ki la ai kam ne em ïa ki Khasi-Jaiñtia bad Garo ki kynthup ïa ka Riangdo Venners Pvt. Ltd, Vishal Saw Cum Veneer Mills Private Limited bad katto katne kiwei de.
Ha katei ka jingjurip ka seng ka la lap ba don ki machine kiba la pyntrei be-aiñ, ka jingjaboh ka lyer ba mih na kitei ki karkhana, ka jingpyntrei bun kynta ïa ki nongtrei ha ka dor kaba rit bad ka jingbym biang ki jaka sah jaka shong jong ki nongtrei.
U Bah Donbok Dkhar haba kren sha ki nongthoh khubor u la ban jur ba ki kam kiba ki trai ri trai muluk ki dang lah ban trei la ka dei kaba heh haduh kiba rit duh ruh, nyngkong dei ban ai kam shuwa ïa ki Khasi-Jaiñtia bad Garo. U la kyntu ïa ka tnad Meghalaya State Pollution Control Board, MIPCB ba kin pynlong ïa ka jingjurip ïa kitei ki karkhana kiba leh be-aiñ.
U la buh jingkylli ïa ka Sorkar da kaba ong, “Balei phi ïa matlah, phi ïa kyllut, haba haduh katne u nongwei shisngi, u wan buh ïa ki mar hangne, hynrei da shong ki Khasi tang ban die kwai dong, phi ïa beh beit bad i kum ba phin ïa bam ïap.”
U la kyntu ruh ïa ki khun samla ba ki dei ban leit ban thepkam ha ki karkhana kiba don ha kylleng ka ri Khasi bad Jaiñtia bad lada ki pyneh ban ai kam, kin pyntip ïa ki nongïalam jong ka HITO ban ïakren ban dawa ïa ka hok, haba ki la wan ban buh ïa ki karkhana hapoh ka Jylla.
