Shillong, Lber 18
U Bah Lahkmen Rymbui uba dei u Myntri ka tnad Information and Public Relation ka Sorkar Jylla u la pyllait paidbah ïa ka website bad logo jong ka Shillong International Film Festival kaba nyngkong ka ban long ha ka 25 tarik haduh 27 tarik mynta u bnai ha State Convention Centre Shillong.
Ïa kane ka jingpyni nam ïa ki phlim la kyrshan da ka National Film Development Corporation kaba hap hapoh ka Ministry of Information and Broadcasting jong ka Sorkar India.
U Bah Lahkmen u la ïathuh ba kane ka jingpyni nam ïa ki phlim ki kynthup ïa ki phlim na jylla, na thaiñ shatei lam-mihngi, na rithor bad nabar ki ri.
U la ong lyngba kane ka festival, ki briew kiba wan na kiwei ki jylla kin tip ïa ka jinglong kyrpang ka jylla namar ka jingdon ki jaka jngohkai kiba itynnad.
U la ong biang ba ka jingpynmih phlim hapoh ka jylla kam dei kaba dang shen hynrei ka la slem namar ka dei ka phlim Laiphew Syiem kaba la pynmih nyngkong, nangta ka wan sa Manik Raitong ha u snem 1984 bad mynta la bun ki nongak, ki nongshna bad kiba pynmih ruh.
Shuh shuh u Bah Lahkmen u la pyntip ba ha kine ki lai sngi kan don ka jingai jinghikai ïa ki director bad producer hapoh ka jylla.
