Jerusalem, Lber:
U Myntri kam bar ri jong ka Israel, u Gideon Saar, u la ong ba ka Israel ka la jop ia ka thma pyrshah ia ka Iran, hynrei um shym la ai jingpynshai pat hato ka thma ka la kut lane haduh lano kan kut noh syndon. Hynrei u la ong ba ka Israel kan iai bteng ia ka jingiakhun, tad haduh ba kan da ioh ia ki jingthmu bad jing-angnud jongka baroh.
Haba ai jingkren sha ki lad pathai khubor ha ka Sngi Ba-ar, u Saar u la ong ba ka Israel ka leh ia kiei- kiei baroh, khnang ban weng bad tehlakam lypa ia ki jingeh bad jingma kiba ap ia ka Israel hi hadien- habud, hynrei um shym la pynpaw shai ruh ba kumno ka sorkar kan leh, ba kan lah ban ioh ia kitei ki thong bad ki jingthmu kiba ka la buh baroh.
“Dei ban long kiba iaishah”, u la ong, haba kren ha ka sngi kaba 18 jong ka thma kaba la pyniap ia palat 2,000 ngut ki briew, kiba bun na ki ha Iran bad Lebanon, hynrei ruh ha Israel, Iraq bad ha kylleng ka Gulf.
U Saar bad kiwei kiwei ki heh sorkar jong ka Israel, ki la ong ba ka jingthmu ka long ban pyntlot shibun ia ka jinglah jong ka Iran ban pynlong ia ki jing thombor pyrshah ia ka Israel ha ka por kaba jrong, katba ka dang thaw ia ki jinglong jingman hapoh ka Iran kiba lah ban pynlah ha kaba kut ia ki nong Iran ban pynhap noh ia ki nongsynshar jong ki.
Hynrei u Saar ha ka Sngi Ba-ar, u la kam ruh ba “ka jingsynshar” ha Iran lah ban pynhap tang da ki paidbah Iran.
Ki shipai jong ka Israel, ki la ong ba ki la pynlong ia ki jinghiar thma na suin ia ki lieng pynher namding ballistic missile jong ka Iran, bad ki jaka buh bad pynmih namding. Ka la bom ruh ia ki jaka ba ka la ong ba ki don jingiadei bad ka prokram nuclear jong ka Iran, bad ka la thombor ruh ia ki bor pahara.
“Ngi la jop lypa”, la ong u Saar, da kaba batai ïa ka Iran kum ka Ri kaba la “tlot bor haduh katta katta” bad kam dei shuh kum ka ri kaba ka la long shwa ba ka thma kan sdang ha ka 28 tarik u Risaw, da ki jinghiar thma lang jong ka U.S. bad ka Israel.
“Kane ka long kaba shai na ka bynta jong ngi bad na ka bynta ki para marjan jong ngi hynrei ngin bteng haduh ka kyrdan ba ka mishon kan long kaba pura,” u la ong.
Wat ha ka por ba ka Saar ka la kam ïa ka jingjop, da kaba pynkynmaw ïa ki jingkren jong u President Donald Trump ha ka 11 tarik u Lber, ka Iran ka la siat bun tylli ki namding sha Israel ha ka sngi Balang, kaba pynpaw ïa ka jingbteng jong ka Tehran ban pynlong ïa ki jinghiar thma kiba jngai hadien ar taiew tam jong ka thma.
Ka sorkar Trump ka la ai ïa ki dak kiba ïapher bapher halor lano ka jingïakynad ka lah ban kut noh, ha ki por ba ka la ai jingmut ba ka lah ban kut noh shen katba ka la pyni ruh ba ka jingïakhih ka dang ïaid shakhmat. Ki heh sorkar jong ka Israel kim shym la ai kano kano ka por, bad ki shipai ki ong ba ki don ïa ki jingthmu thma na ka bynta ki lai taiew ban wan bad hadien.
