Shillong, Lber 18
Ka All Meghalaya Sepak Takraw Association (AM -STA) ka la pynkhreh ban sei ïa ka kynhun ïalehkai ka ban mih-khmat ïa ka Jylla sha ka National Sepak Takraw Championship ka ban long ha Ranchi naduh ka 23 haduh ka 27 tarik mynta u bnai.
Ïa kane la pynbna da u President u Bah Samuel Hashah ha ka jingïalang bad ki nongthoh khubor ha ka sngi Balang. “Naduh ba la seng ïa ka AMSA ha u snem 2025, ka synjuk ka la ai jinghikai ïa ki khynnah da kaba wanrah ïa u coach uba na Assam namar napoh ka Jylla kam pat don ïa ki coach kiba tbit ha kane ka jingïalehkai.”
U la ïathuh ruh ba ki la leit ban ai jinghikai kylleng ka Jylla ïa kane jingïalehkai Sepak Takraw, bad ki khynnah ki la ïoh ïa kane ka kabu ksiar ban leit shim bynta sha katei ka lympung bad kyrmen skhem ba kin wanrah burom ïa ka Jylla.
U la ong ruh ba kane ka synjuk ka dei kaba dangthymmai, kumta kim pat shym la ïoh jingïarap nangno nangno ruh, hynrei u la kyrpad ïa ka Sorkar lyngba ka tnad ïalehkai ba kan kynthup lang ïa kane ka jingïa-lehkai ha ka National Games ka ban long ha ka Jylla ha u snem 2027.
