Shillong, Lber 18
Ka lympung ïalehkai Big Futsal Fest ba la pynïaid da ka Big FM ka la nangjam shaphrang ha ka sngi Ba-ar ha Thrive Sports Arena kaba ha Langkyrding ha kaba la wan shim bynta da ki kynhun ïalehkai na ki tnat treikam bapher bapher jong ka Sorkar Jylla.
Ha kane ka jingïakhun, ka Local Fund Audit ka la pynliem ïa ka My Meg Planning lyngba ka tie-breaker da 2-1 kol hadien ba kine ki kynhun ki la ïakhaid mar 3-3 kol. Kumjuh ka Water Resources ka la jop lyngba ka tie-breaker ïa ka MIMHANS hadien ba ki la ïakhaid mar 4-4 kol.
Ha kiwei pat ki jingïalehkai, ka Meghalaya Legislative Assembly FT ka la pynjem khnap ïa ka ITI haduh 8-0 kol, katba ka Shillong Police FT ka la jop haduh 13-4 kol ïa ka PHE.
Te kumta ki la don phra tylli ki kynhun kiba la rung sha ka quarter-final, ha kaba ka S10 Healthcare kan ïakynduh pyrshah ïa ka Banalari Motors, ka Tourism FT ïa ka Meghalaya Secretariat Home Guards, ka Department of Local Fund Audit ïa ka Meghalaya Legislative Assembly bad ka Water Resources ïa ka Shillong Police FT.
