Jowai, Lber 18
Ka ïingdorbar jong ka Jaiñtia Hills Autonomous District Council (JHADC), da kawei ka sur kala rai ban phah sha ka Select Committee ha kaba ïadei bad ka jingpynkylla thymmai ïa ka bor ka iktiar ki dolloi, sirdar bad waheh shnong kaba tip kum ka JHADC Establishment of elaka and village and election, appointment, powers, functions, and jurisdiction of dolloi/sirdar and waheh shnong) amendment bill 2026.
Ïa kane ka bill la wanrah da u CEM jong ka JHADC Ma Thombor Shiwat ha ka sngi sdang jong ka dorbar mang tyngka ha ka 18 tarik Lber.
Hadien ka jingïatai kaba sani bha, la ïoh ruh ka jingai jingmut na ki dkhot ka liang pyrshah bad liang synshar bad la rai ban phah sha ka Select Committee bad thung ïa ki dkhot kynthup ïa ki dkhot na ka liang pyrshah bad liang synshar.
La thung Chairman jong ka select committee da u Ma Thombor Shiwat, katba ki dkhot ki long Lasky Rymbai uba long Deputy CEM, Moonlight Pariat, Medling Swer, Awhai Andrew Shullai, MB Rymbai, Jamshaphrang Pohtam bad Secretary Executive Committee kan long kum ka Member Secretary.
La rai ruh ba lada donkam ban thung ne co-opt ïa ki expert bad kiwei ki dkhot.
Shwa kane, u nongïalam ka liang pyrshah u Bah Andrew Shullai u la kdew ïa katto katne ki mat ba la tyrwa ban pynkylla ïa ka aiñ, kum ka section 4 kaba thmu pynkylla ba ka jinglut jingsep kan long mar shiteng hapdeng ka JHADC bad ki dorbar Elaka.
Ka Section 13, kaba pyndam noh ïa ka por ba la buh 2 bnai haba thung ïa ki Dolloi/Sirdar namar ka ai bor ïa ka Council ban bat ïa ka bor Dolloi ka Elaka da 5-6.
Katba u Rikut Pareiñ u la pyrshah ïa ki ar tylli ki tyrwa pynkylla ïa kane ka aiñ ka Section 4 Sub-section 2 kaba ïadei bad ka jingpynlut mar shiteng hapdeng ki dorbar Elaka bad JHADC ha ki Election Dolloi bad ka Section 13.
