Shillong, Lber 18
Haduh palat 48 hajar ngut ki briew ki la shah ktah bad kumba 13,876 tylli ki ïing ha kylleng ki bynta jong ka Jylla ki la shah ktah jur na ka jingwan khyrwit jong ka ‘erlangthari, u phria bad ka leilieh kaba la jia bad sdang naduh ka 13 tarik mynta u bnai bad khamtam eh ha ka miet shiteng synñia jong ka sngi Nyngkong.
Katkum ka kaiphod kaba dang kiew ba la pyllait ha ka sngi Balang, ka State Disaster Management Authority ka la pyntip ba ka jingkhyrwit jong ka ‘erlangthari ryngkat u slap, u phria bad ka leilieh ka la ktah shibun khamtam ha kylleng ki jaka kiba hap hapoh ki 30 tylli ki Block hapoh ka Meghalaya, kaba la ktah ïa 48490 ngut ki briew bad pynjulor ïa ki 13876 tylli ki ïing.
Katkum kane ka kaiphod kaba la lum jingtip haduh ka 17 tarik mynta u bnai, haduh 745 tylli ki shnong ha kylleng ki district ki la shah ktah.
Ha kane ka jingkhyrwit jong ka ‘erlangthari, uwei u briew u la duh noh ïa la ka jingim katba uwei pat u la mynsaw bad ki la don ruh haduh 66 tylli ki jingtei kiba la shah ktah bad kumba 0.4 hectare jong ki jingthung ki la julor. Kam shym la don satia ka khubor jong ka jingïap ki jingri jingdup ne ka jingjah jong ki briew na kane ka jingkhyrwit jong ka bor mariang.
Ha kane ka jingkhyrwit jong ka ‘erlangthari ryngkat u phria bad u slap, la don ki ïing kiba la shah jynrat ki tnum ïing, don pat kiba watla ym shym la shah jynrat hynrei ki la pei thliew lut bad don ruh kiba la shah jynrat ruh bad ki jingker jingda nalor ka tnum ïing.
