Shillong, Lber 18
Ka Khasi Students’ Union (KSU) Delhi Unit, lyngba ka jingïatreilang bad ka Special Police Unit for North East Region (SPUNER), ki la lah ban pyllait im ïa ki arngut ki khynnah kynthei Khasi kiba la ngat ha ka jingriam jong ki nongkhaïi briew kiba thok da kaba kular ai kam.
Kine ki arngut ki khynnah, iwei iba dang 15 snem ka rta bad iwei iba 18 snem, ki dei kiba na East Jaiñtia Hills, Meghalaya.
Katkum ka jingtip, la ïalam ïa kine ki khynnah sha nongbah Delhi da iwei i paralok iba dei hi na Meghalaya iba treikam ha Delhi, khlem ka jingtip ne ka jingbit ki kmie ki kpa da kaba kular ban ïoh kam kum ki nongtrei hapoh ïing (domestic help).
Haba la poi ha Delhi, ïa kine ki khynnah la ïalam pynban sha kawei ka jaka khem (Spa) ha Haryana, hangne, la pynbor ïa ki ban rung sha ka kam khaïi die met.
Namar ka jingsheptieng, kine ki khynnah ki la ïoh ban phone sha la ïing, bad kiba haïing jong ki pat ki la pyntip mardor sha ka KSU Delhi Unit ban pan jingïarap.
Ka KSU Delhi Unit ka la pyntip mardor sha ka kynhun SPUNER lyngba ka jingïatreilang, ka KSU bad ka SPUNER ki la lah ban lap bad pyllait im ïa kine ki khynnah na katei ka jaka ha Haryana.
Ka KSU Delhi Unit ka phah ka jingsngewnguh sha baroh ki dkhot kiba la shim bynta ha kane ka kam ban ïada ïa ka jingim briew, kyrpang sha i Sabrina, ARC Meghalaya House, namar ka jingïarap ba ryntih, bad sha i Nabam Gungte, Joint CP, SPUNER, namar ka jingïalam kaba biang.
Nangta, ka seng ka ai khublei ruh ïa ka jingshlur bad ka jingtrei shitom jong ka kynhun Rescue Team jong ka SPUNER kiba la don ha madan ban pynshngaiñ ïa kine ki khynnah kiba kynthup ïa u sub Inspector Ngalung Wung, ASI Naveen Kumar, HC Satish Kumar, W/CT Lalrinhluni.
“Kane ka jingjia ka long ka jingmaham kaba khraw ïa ka jingma kaba ki samla jong ngi ki lah ban ïakynduh haba ki leit wad kam wad jam shabar jylla,” la ong ka samla Marbiang Khongwir, President ka KSU Delhi Unit.
“Ngi kyntu ïa baroh ki kmie ki kpa bad ki samla ban long kiba phikir bad kiba sumar bha na ki jingpynshoi ki nongthok kiba kular ban pynïoh kam. Ka KSU ka ïeng skhem beit ban ïada ïa ka bit ka biang jong ka jaidbynriew Khasi ha Delhi-NCR.”
Ka seng ka dang ïatreilang bad ki bor Sorkar ban pynbiang ïa ka jingpynshngaiñ bad ban pynpoi biang ïa kine ki khynnah kynthei sha la ïing hapoh Meghalaya.
