Vijayawada, Lber:
Ka sorkar jong ka jylla Andhra Pradesh ka dang shna 35 tylli ki ïing ap kha khun thymmai ha kylleng ki hynñiew tylli ki Integrated Tribal Development Agencies (ITDA) ban kyrshan ïa ki kynthei riewlum kiba pun khun.
U Myntri ka tnad ka koit ka khiah u Y Sathya Kumar Yadav u la ong ba ïa kine ki ïing la pyntrei ha ka jinglut kaba T.12.25 klur, ha kaba 15 tylli ha Paderu ITDA bad saw tylli ha Rampachodavaram, Parvathipuram, Chintur, Srisailam, bad Kota Ramachandrapuram.
Na kine, 22 tylli ki Centre la khmih lynti ba kin long kiba la pynkhreh ha u bnai Jymmang ne Jylliew, sa ar tylli ha u bnai Naitung, bad kiwei pat ha kaba kut jong une u snem. Kumba ka long mynta, ki la don kumba 76 tylli ki jaka ap ki dang treikam ha kine ki thaiñ jong ka ITDA, ha kaba 41 tylli na kine ki don ki ïing kiba la ai kyrpang, katba ka jingtei pat ka dang ïaid shakhmat.
Kawei pa kawei ka ïing kan don 8 tylli ki kamra, kynthup saw tylli na ka bynta ki kynthei ba armet, ryngkat bad ki paiñkhana, ka kamra shet, ka kamra lehkai, ka jaka pdiang sngewbha, bad ki jaka buh jingbam. Ïa kane ka jingtei, kaba la kot sha ka T. 35 lak kawei ka ïing, la bei pisa da ka National Health Mission bad la khmih bniah da ki heh jong ka ITDA. Ki jaka ki pyniïsoh bad 27 tylli ki PHC, hynriew tylli ki CHC, bad ar tylli ki hospital ha ka thaiñ, ban pynthikna ba ka jingkyrshan ha ka liang ka koit ka khiah kan don.
Ïa ki kynthei ba armet na ki jaka ba jngai na ki jaka sor kiba dei ki riewlum yn wanrah sha kine ki jaka ym duna ïa ka shi taïew shwa ban kha khun da ki nongtrei ASHA bad ki ANM. Kawei pa kawei ka kynthei kan ïoh T.200 shisngi na ka bynta ka bam, katba iwei i nongap ne nongïarap ba ïadon ryngkat in ïoh T.200 na ka bynta ka bam ryngkat bad T.200 kum ka jingsiew bai lutksan na ka bynta ka jingduhnong, kaba kot sha ka T.600 shisngi.
La khmih lynti ba kan pynduna ïa ka jingeh ha ka leit ka wan bad ka koit ka khiah ha ka por ba kha khun.
Ha u snem 2025-26, kumba 11,000 ngut ki kynthei riewlum ki la ïoh jingmyntoi na kine ki jaka, katba 9,500 ngut ki kynthei ki la ïoh jingshakri mynta u snem. Shisien ba la dep tei ïa ki ïing, la khmih lynti ba 13,000 ngut ki kynthei ba armet kin ïoh jingmyntoi.
