Jowai, Lber 18
U Chief Executive Mem-ber (CEM) ka Jaiñtia Hills Autonomous District Council), u Bah Thom-bor Shiwat, ha ka 18 tarik Lber u la wanrah ïa ka mang tyngka ne ka Deficit Budget kaba duna T.15.62 klur na ka bynta u snem mang tyngka 2026-2027.
Kane ka mang tyngka mynta u snem la antad ba ka jingïoh kan long T.293,64,42,000 (Arspah Khyndaiphew lai klur hynriewphew saw lak sawphew ar hajar), katba ka jingpynlut ka long T.309,26,80,500 (Lai spah khyndai klur arphew hynriew lak phraphew hajar san spah.
U Bah Thombor u la pyntip ïa kane haba wanrah ïa ka mang tyngka sngi nyngkong jong ka jingshong dorbar ka council.
U CEM u la ong ba ka jingduna mang tyngka kaba mynta ka la mih khamtam namar ki katto katne ki jingpynlut kiba donkam bad ki bym lah ban kiar, kum ka jingkyntiew ïa ka jingsiew ba manla u snem sha ki nongtrei ne ka increment, ka jingkiew jong ki nongshim penshon bad ki longïing jong ki nongshim penshon.
U la bynrap ruh ba ka jingpynlut ka long kaba donkam ruh ban pynkhlaiñ ïa ka jingtreikam jong ki tnad bapher-bapher ban pynthikna ïa ka jingai jingshakri kaba paka.
U CEM u la ïathuh ruh ba ka Council ka la pyndep ïa ka jinglum jingkheiñ bad la lah ruh ha ka ban aiti ïa ki Annual Account sha ka Accountant General (Audit), Meghalaya, Shillong, haduh u snem 2024-2025.
U la pynpaw ruh ba ka Council ka la pyllait ïa ka jingsiew jong ka wat kaba lai bad kaba khatduh jong ka 20% kaba dang sah jong ka arrear revised pay bad ka pension jong ki MDC, ki MDC barim, ki nongtrei ka council, ki nongïoh penshon bad ki longïing ba bam penshon. Da kane, ïa ka jingsiew ba la pynkylla thymmai la pynkhuid pura na ka pisa jong ka Council hi ha ka snem mang tyngka 2025-2026.
U Bah Thombor u la pyntip ba la pyntreikam ïa ka pension book na ka bynta ki nongshim penshon bad ki longïing bam pension, ryngkat ka jingbthah ban pynthymmai ïa ki man la ka shiteng snem bad ban mih hakhmat ka Pension Disbursing Authority ym duna ïa ka arsien ha ka shisnem, ha u bnai Jylliew bad Nohprah.
Shuh shuh u la ïathuh ruh ba la plie paidbah ïa ka ïing ophis jong ka tnad Taxation, tnad Khliehriat, kaba don ki nongtrei kiba pura.
U la pyntip ruh ba la pynmih ïa ka Phase-1 notification jong ki kur hapoh u pud u sam jong ka Jaiñtia Hills Autonomous District kiba dei hok ban ïoh ïa ka syrnot Scheduled Tribe.
U Bah Thombor u la pyntip ba ha une u snem 2025-2026, T.3,50,00,000 (Lai Klur Sanphew Lak) la ïoh lyngba ka Digital India Land Records Modernization Programme (DILRMP). Na ka skim tied bad ki untied grant, ka Council ka la pyntreikam haduh 48 tylli ki skhim/projek ha kylleng ka East Jaiñtia Hills bad West Jaiñtia Hills, kiba kynthup ïa ki surok, ki tyllong um dih, ki pung um, ki jingker kynroh, ki painkhana paidbah, ki check dam, ki jaka ïalehkai, ki lynti ïaid kjat, ki ïing skul bad ki community all.
U la pyntip ba ka jingthaw ïa ka “District Fund Rules” jong ka Jaiñtia Hills Autonomous District Council, Jowai ka la dep bad la khmih lynti ba lah ban wanrah ha ka Dorbar Lyiur ha u bnai Kyllalyngkot hadien ba la ïoh ïa ka jingmynjur na u Lat.
U la bynrap ruh ba yn leh digitalisation ïa baroh ki khlaw bad ki jaka ba long kum ki khlaw kiba hap hapoh ka jingpeit jong ka District Council, ha ryngkat ka Working Scheme thymmai jong ka tnad kam khlaw na ka bynta san snem kaba treikam naduh u snem 2026-2027, ka dang ïaid shakhmat.
U la pyntip ruh ba ka Jaiñtia Hills Autonomous District Council Service Rules, 1981 ka dang don ha ka jingbishar bniah.
