Shillong, Lber 19
Ka Barcelona, Bayern Munich, Atletico Madrid bad ka Liverpool ki la jam sha ka quarter-final ha ka UEFA Champions League na ka bynta ban ïasoh lang ryngkat ka Real Madrid, Arsenal, Sporting CP bad ka PSG.
Watla kine ki kynhun ki la ïakhaid mar 1-1 kol ha ka wat kaba nyngkong jong ka jong ka pre-quarter final, pynban ha ka jingïalehkai ka wat kaba ar ka Barcelona ka la wanphai da ka jingkhlaiñ bor ha la ïing na ka bynta ban pynliem da 7-2 kol ïa ka Newcastle bad ban tam da 8-3 lyngba ka aggregate.
U Raphinha (6 & 72) bad u Robert Lewandowski (56 & 61) ki la thep mar ar kol, katba ïa kiwei pat la pynbud da u Marc Bernal (18), kumjuh u Lamine Yamal (45+7) lyngba ka penalty bad u Fermin Lopez (51). Na ka liang ka Newcastle ka la pynphai kylla ar kol lyngba u Anthony Elanga (15 & 28).
Lyngba kane ka jingjop ka Barcelona kan ïakynduh pyrshah ïa kawei pat ka kynhun ïalehkai kaba na Spain ka Atletico Madrid ha ka quarter final.
Kumjuh ka Bayern Munich ka la jop da 4-1 kol ïa ka Atalanta na ka bynta ban tam da 10-2 lyngba ka aggregate bad kham hashwa ha ka wat kaba nyngkong katei ka kynhun ba Germany ka la jop da 6-1 kol.
U Harry Kane u la thep ar kol na ka bynta ban kynjoh 50 kol ha ka Champions League, katba u rangïalehai ba dang 16 snem ka rta u Filip Pavic u la long uba dangkhynnah tam jong ka Bayern ban ïoh shim bynta ha kane ka lympung. Te kumta ka Bayern kan ïakynduh pyrshah ïa ka Real Madrid ha ka quarter-final.
Ka Atletico Madrid ka la jam sha ka quarter-final ha ka sien kaba phra ha ki 13 tylli ki aïom ïalehkai watla ka la shah rem da 3-2 kol ha ka Tottenham Hotspur, hynrei ka la tam da 7-5 lyngba ka aggregate namar ka la jop da 5-2 kol ha ka wat kaba nyngkong.
Kane la wan lyngba ki kol ba la thep da u Julian Alvarez bad u David Hancko na ka bynta ban khanglad ïa ka jingïaid lynti ka Tottenham. Te kumta ka Atletico kan ïakynduh pyrshah ïa ka Barcelona ha ka quarter final.
Haba phai sha kawei pat ka jingïakhun kaba la long ha Anfield, ka Liverpool ka la pynliem noh ïa ka Galatasaray da 4-0 kol na ka bynta ban tam da 4-1 lyngba ka aggregate.
U Dominik Szoboszlai u la pynkhih jar nyngkong hashwa ban pynbud ïa kiwei pat kol na u Hugo Ekitike, Ryan Gravenberch bad u Mohamed Salah na ka bynta ban kynjoh sha ka thong jong ka jingjop. Te kumta ka Liverpool kan ïakynduh pyrshah ïa ka Paris St Germain ha ka quarter final ka ban long ha u Ïaïong.
