Guwahati, Lber:
Ki la don baroh 33 tylli ki projek Hydropower kiba dang pyntrei mynta ha Arunachal Pradesh, ha kaba ka jinglah ban pynmih bording jong ki lada kheiñlang la antad ba kan long 19,165 megawatts.
Ki jingtip ba la sam da ka tnad pynmih bording jong ka jylla ha ka dorbar mang tyngka jong ka Ïingdorbar jong ka Arunachal Pradesh kaba dang shu kut shen, ki la pynpaw ba tang phra tylli ki projek pynmih bording kiba la dep pyndep haduh mynta.
Ïa ki jingtip ba bniah la ai halor ka jingkylli ba la wanrah da u MLA u Wanglin Lowangdong.
Ki projek kiba treikam ha ka jylla ki kynthup ïa ka Dikshi Hydropower Project (24 MW), Kameng Hydroelectric Project (600 MW), Khangtang Hydropower Project (7 MW), Lower Panyor Hydropower Project (405 MW), bad ka Pare Hydropower Project (110 MW).
Napdeng ki tnad kiba donkti, ka North Eastern Electric Power Corporation Limited mynta ka don bun eh ki projek ha ka jylla, kaba pynïaid ïa ki 11 tylli ki skhim.
Na kine, lai tylli ki la dep ban sdang treikam. La bud sa ka Satluj Jal Vidyut Nigam Limited kaba don san tylli ki projek, katba ka NHPC Limited ka dang pyntrei lai tylli ki projek.
Ka tnad bording ka la pynpaw ruh ba ka Subansiri Lower Hydroelectric Project kaba don ha khappud hapdeng ka jylla Assam bad ka jylla Arunachal Pradesh ha Kamle distrik ka la jan dep.
Ka kam ka la ïaid shaphrang bha, bad la pyntreikam ïa ki jaka pynmih bording jong ka plant kawei hadien kawei pat. Ïa kane ka jaka pynmih bording la shna ban pynmih 2,000 MW ka bording baroh kawei, ha kaba ïa ka jingpynmih la phiah hapdeng ki 8 tylli ki jaka pynmih bording kiba la buh dor 250 MW kawei kawei.
