Shillong, Lber 19
Ka Shillong Lajong FC ka la wanphai da ka jingjop ha ka jingïalehkai shabar na la ïing jong ka lympung ïalehkai National Football league, hadien ba ka la pynliem noh ïa ka Chanmari FC da 2-1 kol ha ka sngi Palei ha Aizawl bad ban jam sha ka kyrdan ba hakhlieh.
Kane ka nam jop ka la wan urlong lyngba u vice-captain u Phrangki Buam na ka bynta ban pynlong ïa ka kynhun ïalehkai ka nongbah hapoh ka jingïalam u Virendra Thapa (coach) bam khur ïa ki lai poiñ.
Kane ka long ka jingïalehkai kaba nyngkong ïa ka Lajong ban ïakhun shabar na la ïing ha kaba ka la pyrshang ban ïakhun tyngeh naduh kaba sdang. Hynrei ka Chanmari FC ka la ïoh ban pynkhih jar nyngkong eh lyngba ka free-kick ba la shut da u Christopher Kamei ha ka minit kaba 16.
Watla ka Lajong kaba la shah rem ha ka jingïalehkai ha la ïing ha ka Diamond Harbour da 2-1 kol, kam shym la duh jingkyrmen ha kaba ka la pyrshang ban ïakhun tyngeh bad hashwa ba kut ka jingïalehkai jong ka kylla step ba ka la lah ban pynphai kylla lyngba u Buam ha ka minit kaba 45+2 na ka bynta ban ïakhaid mar 1-1 kol.
Hadien ba la bteng ïa ka jingïakhun jong ka kylla miet baroh ar ki la pyrshang ban ïalehkai bha. Hashwa ban wai artad u Phrangki u la lah ban pynurlong biang sa shi kol ha ka minit 90+5 na ka bynta ban pynlong ïa ka kynhun ban khur syndon ïa ka jingjop.
Lyngba kane ka nam jop ka Lajong ka la jam sha ka kyrdan ba hakhlieh ha kaba ka la kamai 7 poiñ na ki saw sien ïakhun ha kaba ka la tam lyngba ka jingïapher ha ka jingthep kol ïa ka Rajasthan United bad ka Sreenidi Deccan, kiba la hiar sha ka kyrdan ba-ar bad balai.
Te kumta ka Lajong kan leit ïakhun pyrshah ïa ka Gokulam Kerala FC ha ka 26 tarik mynta u bnai ka ban long ha ka por 6:30 janmiet ha Payyanad Stadium, Manjeri.
