Shillong, Lber 19
U Myntri Rangbah ka Jylla u Conrad K Sangma u la ong ba ki kam thombor ha Ri-lum Garo ki la nang duna bad ka jingim ba man ka sngi ki nongshong shnong ka la sdang ban wanphai biang sha ka rukom kaba ju long, watla ka Sorkar ka dang pynlong ka jingpeit pyrman bad ïada na kino-kino ki jingkulmar.
U Conrad haba kren sha ki nongthoh khubor hadien ka jingïakynduh ïa u Lat ka Jylla u CH Vijayashankar u la ïathuh ba ki jingkulmar ki la nang duna, lait noh ki katto katne ki jingjia ba shisien lano eh.
“Ka jinglong ba jai-jai ka la wan phai, ki briew mynta ki la ïaid shakhmat bad ka jingim ba man ka sngi. Hadien ba la bishar bha ïa ka jinglong jingman, ngi la weng noh ïa ka hukum ban khang ïa ka kor internet, hynrei ngi dang buddien bha ïa ka jinglong jingman bad ngi dang peitngor bha ban pynthikna ïa ka jinglong jingman kumba ju long” la ong u Conrad.
U Conrad u la ai ka jingbatai kaba bniah ïa u Lat halor ka jinglong jingman kaba long mynta ha Ri-lum Garo, kaba mih na ka jingïakhih ba poi shaduh u pud ka jingïashoh ïadat, pyrshah ïa ka jingïashim bynta jong ki bym dei riewlum ha ka ilekshon MDC ha GHADC, ïa kaba la pynkynriah noh dang shen.
“Ha ki ar taïew ba la dep, nga la don ha Ri-lum Garo jan ha baroh ki sngi, nga la ïoh ban ïakren ruh bad u Lat lyngba ka phone, kumta, nga sngew dei ba nga hap wan ban batai ïa u Lat haba ïadei ka jinglong jingman ba mynta ha Ri-lum Garo bad ruh ki jingjia bapher-bapher kiba lam sha ka jingthud ka shong suk shongsaiñ” ula ong.
Ha kaba ïadei ka jingkem briew na ki jingkulmar, u Conrad u la ong ba ka jingkem briew ka dei ka kam jong ki pulit bad um don jingtip kaba bniah ïano la kem bad katno ngut la kem, hynrei ki pulit ki la leh la ka jong ka kamram bad kane ka sienjam jong ki pulit ruh ka dei katkum ki kyndon aiñ.
Ha kane ka jingïakynduh u Myntri Rangbah ka Jylla ïa u Lat la synran lang u Symbud Myntri Rangbah ba khmih ïa ka tnad kam Pohïing (Home) u Bah Prestone Tynsong.
