Shillong, Lber 19
Ka Confederation of Meghalaya Social Orga-nisations (CoMSO) ka pynpaw ïa ka jing-sngewkhia kaba jur halor ka jinglong jingman ha Garo Hills haduh mynta.
Ha ka kyrwoh ba la phah da u Bah Sambormi Lyngdoh, Vice President ka CoMSO u la kdew ba ha kum kane ka por la donkam ban wanrah ïa ka jingsuk bad ka jingshngaiñ hynrei ki sienjam ba dang shen ba la shim da ka Sorkar Jylla, khamtam ka jingkem ïa ki nongïalam jong ki kynhun sengbhalang ka Rilum Garo ka la nang wanrah pynban ïa ka jingbymshngaiñ bad ka jingïakynad ha ka thaiñ hi baroh kawei.
U la ong ba ka CoMSO ka ngeit skhem ba ki kynhun Sengbha-lang ki don ka bynta kaba kongsan ha ka ban pynpaw ïa ka sur bad ki jingeh jong u paidbah.
“Ka jingkem ïa ki nongïalam sengbhalang kam dei ka lynti ban wanrah jingsuk, hynrei ka lah ban pynheh shuh-shuh ïa ka jingïakynad bad ban wanrah ïa ka jingbym shaniah hapdeng ka Sorkar bad u paidbah. Kum kine ki sienjam ki lah ban wanrah jingeh pynban ïa ki jingpyrshang ban wanrah biang ïa ka jinglong kaba jai jai ha ka thaiñ hi baroh kawei,” u la ong.
Namar kata, u Bah Sambormi u la kyrpad jur ïa ka Sorkar Jylla ban shim noh mardor ïa ki sienjam ban wanrah ïa ka suk ka saiñ da kaba sangeh noh ïa ki jingkem shuh-shuh ïa ki nongïalam bad dkhot ki sengbhalang bapher-bapher bad ban buh hakhmat eh ïa ka jingïakren bad ïa sngewthuh jingmut ban pynbeit ïa ki jingeh baroh. Da kaba ong “Ym lah ban wanrah ïa ka jingsuk da ka bor, hynrei ka jingsuk kan wan lyngba ka jingsngewthuh, ka jingïadei bad ka jingïatreilang.”
Ka CoMSO ka khot bad kyntu ïa ka Sorkar ban shim mardor ïa ki sienjam ban pynjem ïa ka jinglong jingman, ban pynthikna ïa ka jingpyllait noh ïa kiba la shah kem baroh bad ban ïatreilang bad ki nongïalam seng paidbah ban wanrah biang ïa ka jingsuk bad jingïatylli ha Garo Hills.
Ka CoMSO ka pynpaw biang ïa ka jingangnud jong ka ban ïeng ryngkat bad u paidbah bad ban kyrshan ïa baroh ki jingpyrshang ban wanrah ïa ka hok, ka jingshngaiñ bad ka jingsuk kaba neh slem ha ka thaiñ.
