Shillong, Lber 19
Ka Langsning XI CC bad ka Rhinoland Cricket Academy ki la khur jingjop ha ka Late P.A. Sangma Memorial T20 Cricket Tournament 2026 ha ka sngi Palei ha madan ïalehkai kriket jong ka MCA ha Polo.
Ha kane ka lympung ïalehkai ba la pynlong da ka Shillong Cricket Association (SCA), ka Langsning ka la pynliem noh ïa ka Donkin CC da 7 wiket. Ka Langsning kaba la jop ïa ka kynting pisa, ka la ailad ïa ka Donkin CC ba kan tied nyngkong ha kaba ka la kamai 110 run bad shah pynkhyllem baroh ki nongtied ha ki 18.1 over. Kane ka la wan lyngba ka jingïalehkai bha u Chengkham Sangma, uba la khur 4 wiket bad u Aaron Nongrum uba la ïoh 3 wiket na ka bynta ka Langsning. Katba u Krishna Thapa u la tied 35 run na ki 29 bol ïa ka Donkin.
Haba wan shimti ïa ka pali kaba ar, ka Langsning ka la lah ban kynjoh sha ka thong da kaba kamai 114 run bad shah pynhap 3 wiket ha ki 15.1 over. U Nishanta Chakraborty u la long u nongtied uba kynsai ha kaba u la ïoh ban khyrwit ïa ka shiteng spah kaba 52 run na ki 37 bol bad u Ayush Agarwal u la ïoh 29 run na ki 19 bol. Katba u Agreas Cham u la khur 2 wiket na ka bynta ka Donkin. Ïa ka nam Player of the Match la khur da u Aaron Nongrum.
Haba phai sha kawei pat ka jingïakhun kaba ar, ka Rhinoland Cricket Academy ka la jop da 77 run ïa ka Shillong Sixers. Ka Rhinoland kaba la shimti ban tied nyngkong, ka la kamai 184 run bad shah pynhap 5 wiket ha ki 20 over. U Priyanshu u la tied 42 run na ki 28 bol bad u Dhruv Raaj Borah u la ïoh 42 run na ki 44 bol. Katba u Sumeet Gurung u la khur 2 wiket bad ïa ka 1 wiket la ïoh da u Mukesh na ka bynta ka Shillong Sixers.
Haba wan beh ïa ka thong, ka Shillong Sixers ka la kamai tang 107 run bad shah pynhap 7 wiket ha ki 20 over. U Sandeep Roy u la tied 32 run na ki 36 bol bad u Mukesh u la ïoh 24 run na ki 23 bol. Katba u Chirantan Khat u la khur 4 wiket bad ïa ka 1 wiket la ïoh da Mikhail Dohley. Ïa ka nam Player of the Match la khur da u Chirantan Khat.
