Jowai, Lber 19
U Chief Executive Member (CEM) jong ka JHADC u Ma Thombor Shiwat u la kular ban yn pyndep noh ïa jingsiew tulop kaba dang sah hynñiew bnai jong ki MDC bad ki nongtrei ka Council hapoh u Lber, 2026.
U Ma Thombor u la ïathuh ïa kane haba jubab ïa ka jingkylli jong u MDC ka VPP u Ma Jamshaphrang Pohtam ha ka sngi Nyngkong jong ka Dorbar Mang Tyngka jong ka JHADC ha ka 18 tarik ha District Council Hall, Jowai.
U Ma Thombor u la ïathuh ba ka Council ka la mynjur ban pdiang ïa ka jingtyrwa ban siew tulop da ka Sorkar Jylla ryngkat bad ki kyndon ba ïa ka bor ka iktiar jong ka JHADC bala bynshet hapoh ka Sixth Schedule yn nym pynduna ne pynhiar da ka Sorkar Jylla.
Shuh shuh u la ong ba sa kawei ka kyndon ka long ba ka Sorkar Jylla kan nym ktah ïa ka bhah jong ka khajna jong ki mar poh khyndew ba dei ïoh da ka JHADC lada ka ai tulop ïa ka JHADC nalor kiwei kiwei de.
Haba jubab sa kawei pat ka jingkylli jong u Ma Pohtam, u Deputy Chief Executive Member jong ka JHADC u Ma Lasky Rymbai u la ïathuh ba ka pisa kaba dang sah ban pyllait da ka 15th Finance Commission ka long haduh T.4,05,00,000/- na bynta u 2021-22. T.8,40,00,000/- na ka bynta 2022-2023, T.8,46,00000/- na ka bynta 2023-2024. T.8,94,00,000/-na ka bynta 2024 – 2025 bad T.8,76,00,000/ na ka bynta 2025-2026 jong ka untied grant.
U la ïathuh shuh shuh ba ka pisa ba dang sah ban pyllait da ka 15th Finance Commission na bynta ki tied grant ki long T.6,07,50,000 na bynta 2021-22. T.12, 60,00,000 klur na bynta 2022-23, T.12,69,00,000 klur na bynta 2023-24, T. 13,41,00,000/- klur na bynta 2024-25 bad T.13,14,00,000/- klur na bynta 2025-26.
U la ïathuh shuh shuh ba hadien ka jingbuddien jong ka Executive Committee bad u Chairman jong ka 15th Finance Commission, ka Commission ka la dep pyllait ïa ka pisa kaba T.4 klur 5 lak jong u snem 2021-22 sha ka JHADC lyngba ka Sorkar Jylla.
U la ïathuh shuh ba ka Executive Committee ka la leit buddien pat bad u Deputy Chief Minister ba dei khmih ïa ka District Council Affairs ban pyllait noh ïa katei ka pisa bad na ka liang jong u ula kular ban pyllait noh hapoh u Lber, 2026.
