Shillong, Lber
Ka Akhil Bharatiya Vidyarthi Parishad (ABVP) Meghalaya Unit ka la kyrshan ïa ki jingïakhih ki trai-ri Garo ha West Garo Hills bad ka la kyntu ruh ban pynjari pyrkhing ïa ki kyndon ïada jong ka Khyrnit ba 6 ha ka ilekshon GHADC, da kaba maham ban ym kynthup ïa ki bym dei ‘riewlum kum ki nongthep ‘vote’ ne ki kyrtong.
Ha ka kyrwoh, u State Secretary ka ABVP, u Bah Bomsing Khongtir u la ong ba ka jingkulmar ba dang shen ha ka por thep kyrteng ha Tura – ka jingthombor, ki jingjia wiang ding, ka korphiw bad ka jingphah shuh ïa ki bor pahara – ka pynpaw ïa ka jingbym shngaiñ hapdeng ki nongshong shnong trai-ri bad kynnoh ïa ka jingdonkti jong ki nongwan buhai shnong be-aiñ na Bangladesh ha ka ban pyntieng-pynsmiej bad pynjulor ïa ki jingdon-jingem.
“Kum kane ka jingïashim bynta…ka buh jingma kaba khraw ïa ka jingkylla ha ka jingbun briew, ka jingshngaiñ bad ka jingithuh kolshor jong ki briew Garo,” u la ong.
Ka ABVP ka la khot ïa ka jingpynshisha kaba khuid ba shai ïa ki syrnot ‘Scheduled Tribe’, ban leh eiei pyrshah ïa ki briew kiba wan rung be-aiñ, ban kham pynkhlaiñ ïa ka jingpeitngor ha ki khappud bad ban wanrah biang ïa ka suk ka saiñ.
“Ka rukom treikam jong ka Autonomous District Council ka don ban pynkupbor ïa ki jaidbynriew trai-ri; kano-kano ka jingkynriah ka pyntlot noh ïa ka jingthmu ba kongsan jong ka,” ong u Bah Bomsing.
Ka kynhun ka la kyntu ruh ïa ka Sorkar bad ki bor ba dei khmih ban pyntikna ba ka jingthep ‘vote’ sha ka GHADC kan long kaba suk ba saiñ, kaba hok bad kaba bud ryntih ïa ka Riti-Synshar ka ri.
