Agartala, Lber:
Ki la don haduh 1,245 ngut ki lehnoh kiba dei na ki kynhun bapher bapher kiba la shahñiew beaiñ, kiba la leit ban pyndem noh hakhmat ki bor pahara bad ki la wanphai biang sha ka jingim kum ki riew paidbah naduh ka 1 tarik, Ïaïong 2023, la pyntip sha ka dorbar thawaiñ jong ka Tripura ha kine ki khyndiat sngi.
Ïa kane ka jingtip la ai da ka tnad kam pohïing ka jylla lyngba ka jingthoh halor ka jingkylli ba la wanrah da u nongïalam ka liang pyrshah u Jitendra Chaudhury. Ka sorkar ka la pynpaw ruh ba ym shym la don kano kano ka jingjia kaba thymmai kaba ïadei bad ki kam lehnoh ha ka jylla ha katei ka por ba la kdew ha ka jingkylli.
Katkum ka jingtip ba la buh hakhmat ka ïingdorbar, kiba bun eh kiba wan pyndem wait ki dei na ki dkhot ka kynhun National Liberation Front of Tripura (NLFT) ba la ïalam da u Biswa Mohan Debbarma.
Baroh 417 ngut ki dkhot jong katei ka kynhun, kynthup ïa u hehduh jong ka, ki la buh ïa ki tiar ïaleh ha khmat ki bor pahara.
Nalorkata, 394 ngut ki lehnoh kiba dei na ka kynhun NLFT ba la khlieh da u Parimal Debbarma ki la wan pyndem wait, katba 223 ngut ki lehnoh na ka seng NLFT (ORI) ruh ki la ai tiar ïaleh. Sa 220 ngut ki lehnoh kiba ïadei bad ka kynhun shipai All Tripura Tiger Force (ATTF) ki la ïasoh lang ha kane ka jingpyndem wait.
Ki lehnoh kiba la pyndem wait ki la aiti ruh haduh 147 tylli ki tiar ïaleh. Kine ki kynthup 93 tylli ki suli shna hi, 13 tylli ki suloi AK, ar tylli ki Carbine, 6 tylli ki suloi .303, 4 tylli ki suloi ki nong China, kawei ka Chinese Pistol, ka CM Sten gun, 8 tylli ki pistol, 4 tylli ki Revolver, 8 tylli ki suloi Single-Barrel, uwei u Botamax, 4 tylli kki bom kawang kti ba la shna na China bad 2 tylli ki Air gun.
Ka sorkar ka la pyntip shuh shuh sha ka Assembly shaphang ka rukom pynbeit ïa ka jingsuk bad jingpynbha kaba la ïakut hapdeng ka sorkar India bad ki seng lehnoh. Hapoh katei ka jingïateh, baroh ki dkhot jong ka NLFT bad ATTF ki dei ban aiti noh ïa ki tiar ïaleh bad ki tiar kiba ïadei bad kane.
Ki kynhun lehnoh ki la kular ruh ban iehnoh ïa ka jingleh donbor, ban pynkut noh ïa baroh ki kam rieh bad ban wanphai biang sha ka jingim paidbah kaba man ka sngi.
Kum shi bynta jong ka jingïasngewthuh jingmut, ki la mynjur ban sangeh noh ïa baroh ki kam lehnoh hapoh shibnai naduh ba la ïateh bad ki la kular ban kyntiew ïa ka jingïatylli ha ka imlang sahlang ha ka jylla.
Ki la kular ruh ban ym ïarap, hikai ne pynbiang tiar ïaleh ïa kino kino ki seng lehnoh ha ki por ban wan.
Ka jubab ka la kdew shuh shuh ba ka sorkar India ka lah ban pyrkhat ban ai ïa ka jingïarap pynroi kaba kyrpang kaba T.250 klur ha ki saw snem ban pynbha ïa ka imlang sahlang jong ki jaitbynriew riewlum ha ka jylla.
Kum shi bynta jong ka prokram pynbha pat, uwei pa uwei u lehnoh ba la pynshisha ba u la aiti noh un ïoh ïa ka pisa ba la buh thikna kaba T.4 lak ha ka bank na ka bynta lai snem. Ïa ka pisa lah ban pyndonkam kum ka jingpynskhem na ka bynta ki ram ban kyrshan ïa ki jingthmu ban trei shimet.
Nalor kata, uwei pa uwei u briew uba la aiti noh un ïoh ïa ka bai bylla kaba T.6,000 man u bnai na ka bynta lai snem ban siew ïa ki jinglut jingsep katba u dang sah ha ki jaka sah ba la buh kyrpang.
Ka sorkar ka la bynrap ba lada pynbha pat ïa u lehnoh uba la aiti noh shwa ban kut ka por lai snem, yn pynsangeh noh ïa ka bai bylla man u bnai bad ha ka jaka jong u yn ai ïa ka pisa ba la buh thikna kaba T.4 lak ha ka kyrteng jong utei u briew shimet.
