Thiruvananthapuram:
Ha ka jingkylla kaba khraw ha ka saiñ hima sima, u A Suresh, uba dei u nongïarap shimet barim jong u Myntri Rangbah barim ka Kerala u V S Achuthanandan, u la pynïasoh ïalade sha ka Congress ha ka sngi Ba-ar.
U la shim ïa ka jinglong dkhot jong ka seng kaba tikna na u President ka Palakkad DCC u A Thankappan. U la thmu ban ïakhun na Malampuzha konstitwensi kum u kyrtong ka seng Congress halor ka shap jong ka seng.
U Suresh u la ïathuh ha ki lad pathai khubor ba ka rai ban pynïasoh sha ka Congress ka dei baroh kawei ka rai jong u hi. U la kren shai ba ki nongïalam ka seng kim shym la leit shajan ne pynkohnguh ïa u.
“Nga la pyrkhat la katto katne por la nga dei ne em ban pyni ïa ka jinglong ba ïaineh ha ka CPM, hynrei ka seng ka la buh sharud ïa nga, dei kata kaba la pynlong ïa nga ban pdiang ïa ka jingïakhun kyrtong ka UDF”, u la ong.
U Suresh u la pynpaw ha kaba sdang ba un ïakhun kum u kyrtong shimet. Hynrei katba nang mih ki khubor ba u lah ban mih madan ha Malampuzha ryngkat ka jingkyrshan jong ka Congress, katto katne ngut ki nongïalam ka seng bad ki nongtrei ba shapoh ki la pynsngew ïa ka jingeh jong ki sha ki nongïalam ka jylla, da kaba pynpaw shai ba ki kham jied ïa u kyrtong uba ïakhun ha ka dak jong ka Congress.
Kane ka jingai jingmut na shapoh la sngewthuh ba ka la ktah ïa ka jingkylla, kaba la pynlong ïa u Suresh ban rai ban ïasoh pura bad ka seng bad ban ïakhun kum u kyrtong ba pura jong ka.
