Nongpoh, Lber 19
Ha kawei ka jingjia ha ka step phyrngap jong ka sngi Palei, kawei ka trok kit soh Watermelon kaba don ïa u registration number JK02-CB-4235 kala kem ding kynsan ha ki bynta jong ka surokbah National Highway 6 ha Shangbangla, Ri Bhoi District kat haduh ba kala ingkhong hi khaid.
Katkum ka tyllong khubor ba la ïoh lum, la ïathuh ba kane ka jingkem ding kynsan katei ka trok ka dei ha ka por kumba 2:30 eiei ha katei ka step phyrngap katba ka dang kiew sha nongbah Shillong.
Ka jingkem ding jong katei ka trok kala pynlong ruh ïa ki soh Watermelon ba kin hap bad tuid ha ka surok bah ha kaba la sakhi ruh ba ki paidbah nongleit nongwan lyngba kane ka surok, kila hiar bad muja ban tam ïa ki soh kiba dang bha.
Halor kane ka jingjia, ki pulit ka thanad Nongpoh mar mar ki la leit ban pynlong ka jingtohkit bad lap ruh ba ym shym la don satia kiba mynsaw bad u nongñiah katei ka trok ruh u la ïoh ban phet ïalade hashwa ba katei ka trok kan kem ding.
