Nongpoh, Lber 19
Ka Muay Thai Association of Meghalaya (MTAM) ha ka sngi Palei ka la sdang ïa ka lympung ïakura 6th Meghalaya State Level Muaythai Championship 2026 ha Indoor Stadium, Saiden, Ri Bhoi District.
Ïa kane ka lympung la wan ban plie da u Bah Sosthenes Sohtun, Myntri ka Sorkar Jylla ba dei khmih ïa ka tnad C&RD ha ka jingdon ryngkat u Bah Angelus Sun, President ka MTAM lem bad kiwei kiwei.
Ha kane ka sngi la sakhi ïa ka jingwan ïashim ki nongïakura kynthei bad shynrang na kylleng ki district ka Jylla kiba don kumba 255 ngut kynthup lang ïa ki heprit. Kane ka lympung ka ban neh lai sngi lynter, kan kut ha ka 21 tarik mynta u bnai.
Haba ai jingkren ha katei ka sngi u Bah Sohtun kum u kongsan, u la ai ka jingkhublei kyrpang ïa ka MTAM hapoh ka jingïalam jong u Bah Angelus kaba la lah ban pynlong ïa kane ka lympung ïalehkai kaba long kum ka rynsan kaba ailad bad kyntiew ïa ki samla donsap ka Jylla ba kin nanglah ban kiew shaphrang ha kane ka kam ïalehkai.
Na ka liang u Bah Angelus pat ha ka jingkren, u la ïathuh ba kane ka lympung ka long ruh kum shi bynta ka jingpynkhreh ïa ki rang bad ‘thei ïakura Muaythai ka Jylla na ka bynta ka National Games 2027 ka ban sa long ha kane ka jylla Meghalaya.
Shuh shuh, ha kane ka sngi, ka MTAM ka la ïoh ruh ban pynkup burom ïa ki rang bad ‘thei ïalehkai ka Jylla kiba la wanrah nam bad burom ïa ka Jylla lyngba ki takma ha ki jingïakhun bapher bapher kiba la pynlong ha ki por ba la leit.
