Shillong, Lber 19
La plie ïa ka jingai jinghikai bad ka workshop kaba ar sngi halor ka “Advance Aquascaping and Aquarium Best Management Practices” ha ka sngi Palei jong ka taïew ha St. Anthony’s College, Shillong.
Ïa kane ka prokram la pynlong da ka ICAR-Central Institute of Fisheries Education (CIFE), Mumbai, hapoh ka NEH Programme jong ka, ha ryngkat ka jingïatreilang bad ka Department of Fishery Science, St. Anthony’s College, Shillong bad ka Department of Fisheries jong ka Sorkar Meghalaya.
U Kongsan ha kane ka sngi plie, u dei u Bah Lahkmen Rymbui, u Myntri ba dei peit ïa ka tnad Pule Puthi jong ka Sorkar Jylla.
U Myntri u la pynlait paidbah ïa ka jingthoh ba la ai kyrteng “Ornamental Fishes of Meghalaya” ha kane ka sngi bad u la ai ruh ka jingkren ban ai mynsiem, ha kaba u la ban jur halor ka jingïatreilang bad ka jingdonkam ban pyndonkam lang ïa ka jingtip saïan bad ki sap treikam na ka bynta ka roi ka par ba neh jong ka tnad ri dohkha.
Ïa ka prokram la pynkut da ka jingkren ai khublei na ka Dr. S.M.B. Kharbuli, Head, Department of Fishery Science, St. Anthony’s College, kaba la pynpaw ïa ka jingsngewnguh ïa ki kynrem ki lyndan, ki nongpynlong, ki nongshim bynta, bad baroh ki nongtrei kiba la ai ïa la ki jingkyrshan jong ki.
La pynkut ïa kane ka prokram da kaba rwai ïa ka National Anthem, bad hadien kata la don ka jingïadih sha.
Ïa kane ka workshop yn pynlong ha ki ar sngi lynter bad kan kynthup ïa ki technical sessions, ka jinghikai treikam (hands-on training), bad ki jingïakren bad ki riew shemphang, kiba ban jur halor ki buit “advanced aquascaping” bad ki rukom sumar aquarium ba bha tam.
