Qatar, Lber:
Kawei ka jaka jong ka Qatar kaba don ïa ka karkhana pynmih umphniang kaba heh tam ha ka pyrthei ka la mad ïa ka jingshah pynjulor kaba jur bha hapdeng ka jingjur jong ki jingshah thombor ha ki jaka pynmih bor ding ha kylleng ka Persian Gulf.
Ka Ras Laffan Industrial City, kaba don ia ka karkhana LNG kaba don kumba shi bynta na ka san bynta jong ka jingpynbiang ha ka pyrthei shwa ba yn pynsangeh ia ka jingpynmih ha kaba sdang jong une u bnai, ka la shah shoh ha u namding jong ka Iran hadien ba saw ngut kiwei pat ki la shah khanglad, la iathuh ki bor pyniaid ha ka por janmiet jong ka sngi thohdieng. Hadien katto katne kynta, ka Abu Dhabi ka la khang noh ïa ki jaka pynmih gas jong ka ha Habshan hadien ba ki la shah ktah ha ki thliew ba la hap na ka jingshah khanglad.
Ka jinghiar thma hadien ha Ras Laffan ha ka step jong ka Sngi Palei, ka la wanrah ïa ka jingpluh ding kaba jur ia katei ka jaka, ha kaba ki bor synshar jong ka Qatar, ki la ong ba ki dang ïakhun ban tehlakam ia ka jingma kaba mih na katei ka jingpluh.
Ki jingjia ki pyni sa kawei pat ka jingkiew jong ki jingïaleh pyrshah ha katei ka thaiñ bad ki bud ïa ki jingshah thombor kiba la thmu ïa ki jaka shna umphniang bad gas ha kine ki sngi ba la dep. Ka dor jong ka umphniang mawshun bad ka natural gas ka la kiew kham mynshwa ha ka sngi hadien ba ka Israel ka la hiar thma ïa ka jaka tih gas kaba heh jong ka Iran ha South Pars. Ka Tehran ka la jubab da kaba maham ba katto katne ki jaka pynmih bor ding ha Qatar, Saudi Arabia bad United Arab Emirates ki la kylla long ki “jingthmu kiba dei hok.”
Ka dor jong ka umphniang Brent, ka la pynjlan ia ka jingkiew, hadien katei ka jingshah thombor, ha kaba ka la kiew haduh 8% ha ka sngi thohdieng, sha ka $111.90 shi barel.
Ka QatarEnergy, kaba la synshar da ka sorkar Jylla, ka ong ba baroh ki briew, la khein ia ki ha ka jaka pynmih LNG jong ka, kaba la shah pynkynriah noh, katto katne kynta mynshwa. Ka tnad kam pohïing jong ka Qatar, ka la ong ba ka ding kaba la mih na katei ka jingshah thombor ka la don hapoh ka jingpynïaid.
Ka Qatar “ka khein ia kane ka jingleh donbor kum ka jingpynjur ia ka jingsynshar jong ka jylla, kumjuh ruh ka jingma kaba beit ia ka jingshngain jong ka ri bad ka jingshong shngain jong ka thain,” la ong ka tnad kam bar ri ha ka jingthoh ha ka social media. Hadien kata ka la hukum ïa ki shipai bad ki bor pahara jong ka Iran bad kumjuh ïa ki nongtrei ba ïadei bad ka Iran ban mih noh na ka ri hapoh 24 kynta.
Ka Abu Dhabi Media Office, ka iathuh ha ka post ha ka X, ba ym shym la don kano kano ka jingmynsaw ha Habshan. Ka Abu Dhabi National Oil Co., ka pynïaid ïa kawei na ki jaka pyntreikam ïa ka umphniang ba heh tam ha ka pyrthei ha sla khyndew hangtei, ha kaba ki don 14 tylli ki rel kiba lah ban pynmih palat ïa ka 6 billion cubic feet ka umphniang ha ka shisngi, kaba biang ban pyndap ïa ka South Korea.
Ka tnat iada ri jong ka Saudi ka la ong ruh ba ka ri ka la pynthut ia ka jinghiar thma jong ki drone kaba la thmu ia ka jaka pynmih gas ha ka thain mihngi jong ka. Ha kawei pat ka jingjia, ki thliew na u namding ba la hap hajan kawei ka jaka pynkhuid umphniang ha Riyadh kaba shathie.
