Macau, Lber:
Ki pulit ka China, ha ka Sngi Balang, ki la iathuh ba kawei ka briew kaba dang ïaid kai pynngad ha katei ka jan miet, ka la shah ktah ka bor jingmut jingpyrkhat hadien ba ka la shah pynthud ha uwei u ‘robot’ haduh ba ki pulit ki la iathuh ba kin hap ban phah ia ka sha hospital naka bynta ki jingsumar kiba bniah.
Ki pulit ki la iathuh ba ki la ioh jing ujor lyngba ka phone ba la pan jingiarap na ki, halor katei ka briew, kaba la “kyndit haba ka la iohi kynsan ia u robot ha lyndet jongka, katba ka dang pyndonkam ia ka mobile phone jongka”.
Ka video kaba la saphriang paidbah online ka pyni ia kawei ka kynthei kaba la bitar pyrshah ia uwei u robot uba don ha katei ka jaka, katba u dang pynkhih ia ki kti nar jong u sha ka, katba ki paidbah kiba la sngew lyngngoh, ki dang leit tur kham shajan bad ki la ialum lang ha katei ka jaka ban peit thuh ia katei ka jingjia.
Ha katei ka video ba la saphriang paidbah, la iohi ia katei ka briew ba ka la kren sha utei u robot bad ong ba ‘napdeng kiba bun tylli ki kam kiba la buh ia u ban leh, balei u leit pynthud ia ka?’ bad katei ka briew ka la kren ia kitei ki kyntien ha ka ktien Canton, ryngkat ka jingkdew kti bad maham ia utei u robot ba um dei ban tur ne pynthud ia ka.
Watla katta, la ong ba katei ka kynthei kam shym la mynsaw bad kam shym la don kano kano ka jingshah ktah kti ha utei u robot, hynrei ki pulit ki la ong ba ka donkam ia ka ban shah sumar ha hospital.
Ki video ha ki social media ki pyni ïa ki ophisar kiba ïalam ïa u robot ba la poi sakma, watla ki pulit ki la pynpaw ba kim shym la kurup ïa utei u robot.
Ia utei u robot la pyniaid da uwei u briew na Macane uba la don ha ka rta kumba 50 snem eiei, uba la ong ba u dang peit-thuh ia ka rukom treikam jong utei u robot bad u thmu ban pyndonkam ia u, na ka bynta ban kyntiew ia ka kam jong u.
Ki pulit ki la ong ba ki la pynkynmaw ia u ba un long uba husiar bha haba pyntreikam ia u robot ban na ka jingwanrah jingma ne pyntieng ia kiwei pat.
Une u robot ha ki dur u iasyriem bad u briew uba la shna da ka Unitree ka kompeni ba la sdang na China.
Ka Beijing ka la pynshlur ia ki kompeni hapoh ka ri ban shna ia ki dur briew, da ka jingkyrmen ban ialam ia ka kam shna robot ha ka pyrthei.
Hynrei ki robot kiba treikam pura ki dang long kiba duna bha ban ïohi, ha kaba ki jingpyni kiba kham itynnad ki long kiba la buh lypa ne pyntreikam na jngai.
