Jowai, Lber 19
U Chief Executive Member (CEM) jong ka JHADC u Ma Thombor Shiwat u la phla ba ka Sorkar Jylla, ka Dorbar Shnong Daistong bad ka Elaka Nongkhlieh ki la pynbor ïa ka Executive Committee ban ai NOC ïa ka M/S Shree Cement Plant Limited ha Daistong namar ba ka Sorkar ka la dep ai jingmynjur lypa ïa katei ka kompeni lyngba ka Single Window Agency bad ka NOC na ka Dorbar Shnong Daistong bad Elaka Nongkhlieh.
U Ma Thombor u la ïathuh haba ai jubab ïa ka motion bala wanrah da u nongïalam jong ka liang pyrshah u Ma AA Shullai ha ka Dorbar Mang Tyngka ha ka 19 tarik Lber.
Haba ïathuh shuh shuh halor ka jingai NOC ïa katei ka company, u Chief Executive Member u la ïathuh ba ka la don ka jingpyrshah halor ka jingai NOC da u Waheh Shnong jong Shnong Daistong da katto katne ki nongshong shnong jong ka Shnong Daistong bad ka la don ka jingpynkheiñ Waheh Shnong hynrei kitei ki nongshong shnong kim shym la wan ai jingtip eiei sha ka ophis jong ka JHADC.
U la ong shuh shuh ba kham hadien, ki briew kiba pyrshah ïa katei ka kompeni dei ma ki hi kiba wan bad dawa ban ai NOC noh ïa katei ka kompeni.
U Ma Thombor u la ïathuh ba ka Executive Committee ka la wanrah ïa ka amendment ne ka jingpynkylla ne jingpynthymmai jong ka JHAD Trading by Non-Tribal Bill 2023 khnang ban nang pynbha ïa ka rukom ai NOC.
Haba wanrah ïa katei ka motion, u Ma Shullai u la kylli hato ka Executive Committee ka la pynlong ne em ïa ka jingtohkit ha katei ka shnong Daistong ban tip hato ki nongshong shnong ki kwah ne em ïa katei ka company bad hato ka jingwan jong katei ka kompeni kan don jingktah ne em ïa ka mei mairang bad ka jingrep jingriang jong ki nongshong shnong.
