Shillong, Lber 19
U Fredrick Banshan Rynjah, Damewanhi Kharjana bad ka Olivia Dkhar ki la rah ïa ka ‘Champion of Champions’ ha ka rynsan ïakhun kti jong ka 35th Annual State Arm Wrestling & 3rd Para Arm Wrestling Championship 2026, kaba la kut noh ha ka 14 tarik mynta u bnai ha Seng Khasi College, Shillong.
Ha kane ka rynsan ïakhun kti kaba la sdang naduh 10 tarik mynta u bnai, la wan shim bynta da palat 500 ngut ki nongïalehkai kiba mihkhmat ïa ki distrik bapher bapher jong ka Jylla bad ki klob kiba napoh ka jylla Meghalaya.
Kat kum ka kyrwoh la ong ba ka kynhun kaba khlaiñ bha na Garo Hills ruh ka la nang pynshitrhem shuh shuh ha kane ka lympung.
Ha katei ka kyrdan ïalehkai jong ka Champion of Champions, u Fredrick Banshan Rynjah u la khur ïa ka nam jop ha ka kyrdan ïalehkai kti kamon jong ki shynrang lem bad u Damewanhi Kharjana, uba la khur ïa ka nam lahduh ha ka jingïakop da ka kti kadiang jong ki shynrang. Katba ka Olivia Dkhar ka la jop ha ka liang kadiang bad kamon jong ki kynthei.
Ha katei ka sngi pynkut la ïadon lang ka Kong Merilda Nongsiej, Secretary ka Seng Khasi College kum ka kongsan, ryngkat ka jingdon lang ka Kong Herina Dohtdong, Principal ka Seng Khasi College, Bah Sadon Blah (President ka HNYF), ha ryngkat u Bah M. Slong bad u Bah D. Ryntathiang nalor kiwei pat.
Napdeng ki nongïalehkai ba paw ha kane ka rynsan ïakop, u Jimmison Marweiñ u la khur ïa ka jingjop ha baroh ar ki kyrdan jong ki Youth bad Senior Men’s Category ha ka liang kadiang bad kamon, katba ka Bandarika Kharkongor ka la pyni ruh ïa ka jingïalehkai kaba itynnad, ha kaba ka la jop ha baroh ar tylli ki jingïakop jong ka kti kamon bad kadiang.
Shuh shuh la sakhi ruh ïa ka kyrdan ïakop jong ki nongïalehkai kiba don jingduna ha ki dkhot met (para), ha kaba u Graham Jones Kharbani bad ka Prisca Pyngrope ki la jop ïa ka kyrdan PID Sitting (Physical Impairment athletes) ha baroh ar tylli ki kti. Ha ka Para Standing, u Hubert Paliar (ka diang) bad u Alexander Lyngdoh (ka diang) ki la ïoh ban khur ïa ka nam jong ki shynrang, katba ka Sinity Lutmon Kympat ka la bat ïa ka nam lahduh ha ka liang ki kynthei ha baroh ar tylli ki kti.
Kiwei pat ki nongjop kiba paw ki kynthup ka Da-i-ne Shisha Makdoh, u Alvin Rapsang, u Jubanskhem Marweiñ, Victoria Nongshli, u Fredrick Banshan Rynjah, bad u Damewanhi Kharjana, kiba la pyni ïa ka jingïalehkai kaba itynnad bha ha kylleng ki kyrdan ïalehkai Sub-Junior bad Junior. Ha ka Masters bad Grandmasters ki nongjop ki kynthup ïa ka Kong Margret Pathaw, ka Mihsngewbha Rymbai, Banbatjuban Khongwir, Baniaikyrsoi Khongwir, bad u Everson Thangkhiew.
Ka South West Khasi Hills District ka la ïoh ïa ka nam Most Disciplined Team jong kane ka rynsan ïakop. Ha ka jingïakhun kyllum ïa ki gym, ka Sunsen Power Gym Club ka la ïoh ïa ka kyrdan ba nyngkong, bud sa ka Ri Bhoi District & Roydapbiang Gym ha ka kyrdan ba-ar, bad balai ka West Khasi Hills District.
Lyngba kane ka jinglah ban ïalehkai bha, ki la don palat 90 ngut ki nongïa-lehkai ki la shah jied ban mihkhmat ïa ka Jylla Meghalaya sha ka rynsan ïakop jong ka National Armwrestling Championship 2026 ka ban long ha Ahmedabad, Gujarat naduh ka 29 tarik u Jymmang haduh ka 2 tarik u Jylliew.
