New Delhi, Lber:
Uwei u briew u la shah kem halor ka jingkynnoh ba u die be-aiñ ïa ki tyndong LPG ha ka thaiñ Jamia Nagar jong ka thaiñ Shathie-Mihngi jong ka Delhi.
Na u la ïoh kurup haduh 62 tylli ki Cylinder, la ïathuh ki pulit ha ka sngi Ba-ar.
“Ïa une uba shah kynnoh la tip kyrteng kum u Shahnawaz uba sah ha Jamia Nagar, kumba ar taïew hashwa, u la ïakynduh ïa u Mukesh bad u la sdang ban die be-aiñ ïa ki tyndong LPG ha Jamia Nagar ban ïoh kamai kaba heh bha”, la ong uwei u heh pulit.
Katkum ka jingïathuh ki pulit, la ong ba ki dang ïaid pahara ha ka lah sngi U Blei bad ki la poi ha Gali No. 39, Yamuna Pusta, Jamia Nagar. Ha ka jingpahara, ki pulit ki la ïohi ïa uwei u briew uba ïeng hajan kawei ka kali kaba la thep da ki Cylinder, kaba la pyndonkam na ka bynta ban die Cylinder ha katei ka jaka. “Da ka jingsuba, ki pulit ki la pynsangeh ïa utei u briew bad kylli bniah ïa ka licence/bor jong u ban die ïa ki tyndong LPG”, la ong uwei u heh pulit.
“Utei u briew um shym la pyni ïa kano kano ka licence ne ka bor kaba biang bad u la pynpaw ba um don ïa kano kano ka jingbit kaba kum kata. Haba la peit ïa ka kali la ïoh kurup haduh 62 tylli ki tyndong LPG, na kine 48 tylli ki dei ki tyndong ba la pyndap bad 14 tylli ki dei ki tyndong ba la pyndonkam”, la ong u DCP (southeast) u Hemant Tiwari.
Ha ka jingtohkit ba nyngkong, une uba shah kynnoh u la pynpaw ba u die ïa ki tyndong LPG sha ki nongshong shnong khlem da ai Resit ban ïoh kamai kham heh.
U la pynpaw ruh ba u trei ha ka jingïatreilang bad uwei pat u briew, uba la ithuh kum u Mukesh, uba la pynbeit ïa ki Cylinder, la ong shuh shuh u heh pulit.
La buh jingthoh ïa ka mukotduma hapoh ka kyndon ba 7 jong ka Essential Commodities Act bad 61(2) jong ka Bharatiya Nyaya Sanhita ha thanat Jamia Nagar, bad la kem ïa une uba shah kynnoh.
“Ha ka jingtohkit, u nongshah kynnoh u la ong ba ïa kine ki Cylinder la pynbeit da u paralok jong u u Mukesh najan kawei ka jaka die gas ha Meerut, UP. La kynnoh ba ïa kine ki Cylinder la thep ha ka kali ha ka jaka ba kyrpang hajan ka jaka die gas shwa ban kit sha Delhi ban die beaiñ,” ong une u heh sorkar.
