Shillong, Lber 19
Ka ïingbishar Meghalaya High Court kala buh jingkylli ïa ka jingkam jong ka National Highway Authority of India (NHAI) ba ka jingtrei pynbha ïa ka surok Jowai-Ratacherra kala dep, hadien ba ka kaiphod u Amicus kala pyni ïa ka jingdon ki thliew kiba heh ha surok Byndihati, Tongseng bad Ratacherra nalor ki nala kiba set jaboh ba lam sha ka jinglang um.
“Ka paw ba ka jingtip ba la wanrah da u Chauhan…ka dei kaba bakla”, ong ka Division Bench ba kynthup ïa ka Chief Justice Revati Mohite Dere bad Justice W Diengsoh ha ka hukum ba pynmih ha ka sngi Palei.
Haba kdew ïa ka kai-phod u Amicus halor ka jingleit jurip ïa lynter jong ka surok hadien ka hukum ba 11 tarik Lber, ka ong, “Ïa kane ka record….la pynrung lang ha ki jingthoh. Ha kane ka kaiphod la suh lang ïa ki dur jong ki thliew. Ka paw ba ha ki bynta jong ka surok ha Byndihati, Tongseng hashwa ban poi ka jingkieng, ki don ki thliew kiba heh hapdeng jong ka surok, kumjuh ruh ha Ratacherra marjan ka petrol pump. Ki don ruh ki thliew kiba heh ha Tongseng kaba dawa ban leh eiei mardor. La kdew ruh ha ka kaiphod ba ki jingker kynroh, ki nala bala shna ha kiba bun ki bynta, ki slab ki dei kiba set jaboh ne ki bym shna bha kaba lam sha ka jinglang ka um ha ki katto katne ki bynta”.
Ka ïingbishar ka pynpaw ruh ba ka PIL kala shu sahteng naduh u snem 2022 bad “jan saw snem ka por kala ïaid hynrei watla katta ym shym la lah ban trei dep ïa ka surok”.
Ka ïingbishar kala bthah ïa u Project Director Anand Singh Chauhan ba un wan mih sha ïingbishar ha ka 20 tarik Lber bad la ai ïa ka por ïa u Amicus ba un wanrah ïa ka jingthoh (statement) ka bym dei ha ïingbishar.
