Shillong, Lber 19
Ka Meghalaya Pradesh Congress Committee (MPCC) kala pyntip ba kan ïai buddien ïa ka mukotduma bala tynjuh ha ïingbishar Meghalaya High Court pyrshah ïa ki 4 ngut ki MLA kiba leit pynïasoh noh ïalade sha ka National People’s Party (NPP) tad haduh ban da rai ïa kane ka kam katkum ka jinglong jingman ka kam, da ka jingthmu ban pynlong kum ka nuksa ba “ïa ka rai u paidbah” ym dei ban pynlong kam kai ha ka mon ki riewsaiñ pyrthei.
“Ngin ym shim sting ïa kum kine ki kam,” ong u Secretary ka MPCC Bah Manuel Badwar haba ïakren bad ki lad pathai khubor ha ka sngi Palei, haba batai ïa ka writ petition bala mudui sha ïingbishar hadien ba u Lamphang ka ïingdorbar thawaiñ ka Jylla u Thomas A Sangma, u la kyntait arsien ïa ka jingkyrpad ban mait kyrteng ïa ka jinglong MLA kine ki 4 ngut.
Kine ki 4 ngut ki MLA ki kynthup ïa u Bah Charles Marngar (Mawhati), Bah Gabriel Wahlang (Nongstoiñ), Dr. Celestine Lyngdoh (Umsning) bad Bah Ronnie V. Lyngdoh (Mylliem), kiba la leit pynïasoh sha ka NPP. U Bah Ronnie u la rung sha ka NPP ha ka 30 tarik Naitung, 2025 katba ki laingut kiwei pat kila leit rung ha ka 19 tarik Nailar, 2024.
U Lamphang ka ïingdorbar u la ai ka jingithuh ïa ka jingleit ïasoh kine ki 4 ngut ki MLA sha ka NPP.
U Bah Badwar u la ïathuh ba ïa ka jingmudui la kyntait namar u Lamphang u shim ba tang ki MLA kiba lah ban mudui – “hynrei katkum ka hukum ka ïingbishar Supreme Court, mano mano kiba don ka jingsngewtynnad ha ka party ki lah ban leh ïa kane”.
Ïa ka mudui ba nyngkong la ujor da u Bah Ronnie V Lyngdoh hynrei u la weng noh hadien ba u la leit ïasoh sha ka NPP.
Hadien kane, la mudui biang sa shisien sha ka ophis u Lamphang ka ïingdorbar ha u bnai Nailar, 2025 da u Bah Badwar.
Ha ka mudui ba thymmai, u Bah Badwar u la ong, sa shisien la kyntait halor ki nongrim ki bym sngew ïahap satia, kaba pynbor ban leit mudui sha ïingbishar High Court ka ban sa shong bishar ha ka sien kaba san.
Ka ïingbishar, ha ka 25 tarik Rymphang, 2026, kala ailad ban shim ïa ka jingshakri ba shimet bad buh ïa kane ka kam ban nang bishar shuh shuh.
“Ki rukom treikam ba stad kim lah ban pynduh ïa ka hok kaba kongsan, khamtam ha ki mat kiba ïadei bad ka jingsynshar katkum ka riti synshar”, la ong u Bah Badwar.
Nalor kata, ka kynhun aiñ (legal team) jong ka Congress ka la kynthoh ba ka rukom ba saw ngut ki nongthaw aiñ barim ki la phet noh sha ka NPP ka khring ïa ka jingshah weng kam katkum ka Tenth Schedule bad ba u Lamphang u la bakla da kaba weng noh ïa ki jingujor khlem da bishar, da kaba ïaid lait ïa ki rai jong ka Supreme Court kiba ailad ïa ki dkhot jong ka seng ban rah ïa kum kine ki jingkyrpad.
“U Lamphang um shym la ktah ïa ka jingkordor jong ka mukotduma”, la ong u nongïasaid aiñ ka Congress u Kynpham V Kharlyngdoh.
“U la shu ong ba u Secretary ka MPCC um lah ban file namar ba u dei tang u Secretary ym u dkhot jong ka ïingdorbar… Hynrei ki don ki rai jong ka Supreme Court ba uno uno u dkhot jong ka seng ba ïadei kam ruh u lah ban file,” ong u Bah Kynpham.
