Jowai, Lber 19
U Chief Executive Member (CEM) jong ka JHADC u Ma Thombor Shiwat u la ïathuh ba ka Executive Committee kan sa khang khyrdep noh ïa ki District Council Lower Primary School (DCLPS) kiba dang duna bad bun nonghikai khnang ban pynbha ïa ka rukom treikam jong ki skul DCLPS.
U Ma Thombor u la ong ïa kine ki kyntien haba jubab ïa ka jingïathir jingmut kyllum lang jong ka mang tyngka ne ka General Discussion ha ka 19 tarik Lber.
U Chief Executive Member u la ong ba katkum ki kyndon Sorkar, ka Pupil Teacher Ratio (PTR) ka long u ne kawei nonghikai na bynta 30 khynnah skul bad lada 31 ngut ki khynnah ruh ki la dei hok ban ïoh ar ngut ki nonghikai hynrei ki don ki skul DCLP pat kiba don 3 ngut ki khynnah skul bad san ngut ki nonghikai bad ka Executive Committee ka la rai ban khang khyrdep noh ïa kum kitei ki skul DCLP bad ïa ki nonghikai na kitei ki skul ba la khang khyrdep yn pynkynriah kam noh sha ki skul DCLP kiba bun khynnah skul.
Ha shwa ban ai jubab u Ma Thombor ïa ka General Discussion, u MDC jong ka VPP u Ma N Lamare u la kyntu ïa ka Executive Committee ban pynkiew ïa ka jingmang tyngka kaba 50 lak tyngka na bynta ban pynbha pynmiat ïa ki skul DCLP.
Katba ha ka kynta kylli jingkylli, ka Executive Member JHADC ka Kong Violet Lyngdoh ka la ïathuh ba ki ophisar ka tnad Education ki la leit jurip 14 tylli ki skul DCLP haba jubab ïa u MDC jong ka VPP u Ma Soki Lapasam uba la kylli katno sien la pynlong jingjurip ïa ki skul DCLP hapoh u snem 2025-26 da ka tnad Education jong ka JHADC.
U la kylli shuh shuh balei tang 14 tylli ki skul DCLP la leit jurip haba ki don haduh 101 tylli ki skul DCLP bad katkum ka kaiphod bala ïoh bun ki skul DCLP ki bym biang ïa ki umbam um dih bad paiñkhana bad kumta ter ter.
Ka Kong Violet Lyngdoh ka la ïathuh ba na ka daw ka jingduna pisa, ka jingleit jurip jong ki skul ruh ki long kiba duna bad ka tnad Education ka dang pyrshang ban pynbit pynbiang ïa ki skul DCLP katba lah ka bor.
