Shillong, Lber 19
U Executive Member (EM) ka Khasi Hill Autonomous District Council (KHADC), u Bah Powell Sohkhlet, ha ka sngi Palei jong ka taïew u la pynbna ba ka Executive Committee kan thaw da ka Special Committee ban khmih bniah bad pule bniah ïa ki AD Rules, khnang ban ïoh pyntreikam ha ka rukom kaba dei.
Haba kren sha ki lad pathai khubor, u Bah Powell u la ong ba ka EC ka la dep ban bishar bniah ïa ki AD Rules bad lap shibun ki jingduna.
U Bah Powel u la ïathuh ba ka Special Committee kan pule bniah bad bishar bniah ïa ka Rules 128 jong ka AD Rules kaba kdew ïa ka jingshim bynta ki bym dei riewlum ha ka ilekshon sha ki Autonomous District Council.
“Mynta ka EC kam pat rai ïano yn thung kum ki dkhot ka Committee bad pule bniah ïa ka AD Rules hynrei ka thong jong ka Special Committee kan dei hi ban bishar bniah khnang ban lah ban wanrah ka jingpynkylla (Amend) ïa ki kyndon kiba don hapoh AD Rules,” u la bynrap.
“Ka EC ka la aiti ruh sha ki MDC ba kin wad bniah ruh ïa ki Proceeding jong ka Iingdorbar namar katkum ka jingtip ba ngi la ïoh ba mynshwa ka la don ka jingïakren haba ïadei bad ka jingpynkylla (Amend) ïa ka 128. Ngin wad kita ki Proceeding ki kren kumno bad ngi la shaniah ha ki MDC ha ka jingïalam da u Chairman” la ong u Bah Powel.
Ka jingthaw ka EC ïa kane ka komiti ka dei hadien ba la mih ka jingpyrshah ha kine ki sngi halor ka jingïoh thep vote bad thmu ïakhun ilekshon ki briew bym dei ki riewlum ha ki Autonomous District Council, bad khnang ba kan ïaid beit ïaid ryntih, ka EC hapoh ka jingïalam ka VPP ka la thaw ïa ka Special Committee ban peitbniah ïa ki AD Rule.
Shuh shuh u la ong ba na ka liang ka EC kam peit tang ïa ka kyndon kaba 128 hynrei ka EC kan peit bniah ha baroh ki kyndon aiñ jong ka AD Rules kiba haduh mynta, kiba dang pyntreikam ha ki lai tylli ki District Council.
